Wir Wernher vnd Lvd weich die Græns verjehen vnd tv^en allen den chunt, di disen brief ansehent, daz vnser lieber herre vnd vater her Lvd weich der alt Grans vnser vrowen vnd dem gotshaus ze Raitenh(aslach) gegebn hat ze rehtem vnd ze einem||
ewigen selgeræt sein haus datz Burch(ausen) daz minner, daz er mit seinem aigenchleichm gv^et von grvnt hat gepavn auf zwo hofstet, der er ainev het gechauft von dem gotshaus ze Raitenh(aslach) vnd di andern von Ermreichn ze Purchausen, vnd hat in daz selb haus auf geselt auf vron alter vnd geweitigt vnd veruestent mit briefen vnd mit den insigeln sein selbs vnd vnserr zwair brv^eder herrn Wernharts vnd herrn Perngers vnd auch mit der gvnst seiner hausvrowen vron Chvneguntn vnserr lieben mveter vnd aller seiner erben. Vnd wan wier ze der selbn zeit vnd stvnd da bei niht enwaren, daz wir da mit samt vnserm vorgenantem vater vnd brv^edern daz selb selgeræt verschriben vnd veruestet mit vnsern insigeln hieten, verzeihen wi^er vns vnd gebn das selb haus mit samt in dem oft vorgenantem gotshaus vnser vrowen hintz Raitnh(aslach) vnd gestætign in auch daz mit disem brief vnd dar an mit vnsern insigeln. Dar vber verjehen auch wi^er mit samt vnserm lieben vater vnd brv^edern vnd mit allen vnsern vrevnten vnd verwizzen auch daz selbn gotzhaus wol, daz vnser vater dehainen perch noch dehainz likentz^a gv^et noch dehainerlai gv^et, swi^e daz genant mag werden, chlain noch grozz, niht enhat. Vnd der sach aller, daz der also sei, gebn wir in vrchvnd disen offenn brief versigeltn mit vnsern hangenten insigeln. Der brief ist gegebn, do von vnsers herren geburt waren vergangen drevzehen hvndert jar dar nach in dem fvmftzehentn jar, an sand Jacobs tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 601, S. 511-512