Iohannes episcopus servus servorum dei dilecto filio .. preposito ecclesie Salzeburgensis salutem et apostolicam^a benedictionem. | Significarunt nobis dilecti filii . . abbas et conventus monasterii de Raytenhaslach Cisterciensis^b ordinis Salzeburgensis diocesis, quod nonnulli iniquitatis filii, quos prorsus ingnorant, decimas, redditus, census, pensiones^c, terragia, legata, terras, prata, vineas, domos, possesiones, instrumenta publica et quedam alia bona ad monasterium ipsum spectantia temere et malitiose occultare ac occulte detinere presumunt non curantes ea ipsis abbati et conventui exhibere in animarum suarum periculum et eorundem abbatis et conventus non modicum detrimentum, super quo iidem abbas et conventus apostolice sedis remedium implorarunt. Quocirca discretioni tue per apostolica scripta mandamus, quatinus omnes huiusmodi detentores occultos decimarum, reddituum et aliorum bonorum predictorum ex parte nostra publice in ecclesiis coram populo per te vel per alium moneas, ut infra certum competentem terminum, quem eis prefixeris, ea eisdem abbati et conventui a se debita restituant et revelent ac de ipsis plenam et debitam satisfactionem impendant. Et si id non impleverint infra alium terminum competentem, quem eis ad hoc peremptorie^d duxeris prefigendum, extunc in eos generalem excommunicationis sententiam proferas et eam, ubi et quando expedire videris, usque ad satisfactionem condignam facias solenpniter publicari. Dat. Auinion. V non. octubr., pontificatus nostri anno secundo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 614, S. 522-523