Wier der rat von Chrems vnd von Stein versechen^a an disem prief vnd tvn chvnt allen den, die in sehent oder hornt | lesen, die nv lebent oder noch chvnftig sind, daz fuer vns chomen ist bruder Virich zv den Zeiten hofmaister in Reitenhasler hof vnd zaigt vns ein hantvest von dem hochwirdigen vnserm herren chvnig Fridrich von Rom^b, daz der dem apt von Reitenhaslach vnd auch dem conuent da selben sogetanev besvnder genade hat getan zv den zeiten, do er dannoch hertzoge waz, vmb ir haus, daz da leit ze Chrems, daz da heizet in dem Chiel, vnd ist genant der leithauscheler; die weil sev daz selbe haus in ir gewalt habent, so schullent sev do von geben alle jar den^c purgern ze Chrems in ir stevr ein phvnt phenning Winner mvinz vnd auch nicht mere. Nv haben wier der vorgenant rat von Chrems vnd auch die purger mit wol verdochtem mvet vnd mit gvetlich willen vnd auch nach der erwern purger rat von Stein zv den zeiten, do wier iz wol getvn mochten, dem vorgenantem gotzhaus ze Reitenhaslach die selben genad, die in der vorgenant vnser herre hat getan, gelobt fuerpaz ewichlich stæt behalten, also mit bescheidener red, die weil daz vorgenant gotzhaus daz vorgenant haus in ir gewalt habent vnverprvnns, so schvllent sev do von geben alle jar in der purger stevr ein phvnt phenninge Winner mvinz vnd auch nicht mere vnd schullent auch daz selbe phvnt geben alle jar den purgern ze Chrems an sand Jorgen tag; wo sev des nicht entasten, swer dann hofmaister ist in dem vorgenantem hof, den schol man dor vmb phenten mit seinem guetlichem willen; wer aber ze herberg ist in dem vorgenantem haus, der schol sein stevr geben noch seinen staten mit andern purger ze Chrems. Daz die red stæt beleih vnd vnzebrochen dem vorgenantem gotzhaus ze Raitenhaslach, dor vber geben wier disen prief versigelt mit vnser stat insigel ze Chrems zv einem vrchvnde vnd zv einer sicherhait diser sach. Der prief ist geben, do von Christes gepurt worn ergangen drevzehen hvndert jar dor nach in dem achzehentem jar, dez svntages ze mitter vasten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 622, S. 530-531