Wir Hainrich, Ott vnd Hainrich von gots gnaden pfallentz grafen ze Reyn, hertzogen in Bayeren, vergehen offenbar an disem brief, daz vns | der ersam abt Illsvnch vnd der convent ze Raitenhaslach mit alter vnd gv^eter chvntschaft vnd gewissen ze engagen vnsers rates habent geinnert vnd beweiset, das si vnd ir gotshavs den zehenten ab vnsern chasten ze Weilhart vnd ze O^eting von aller vnsrer gv^elt, chlainer vnd grozzer, dev wir haben oder gehaben mvgen in vnsern vorgenanten gerichten ze Weilhart vnd ze O^eting, haben sv^eln vnd enpfahen jarleich an alle vnser vnd vnser amptlævt irrvng. Vnd wan wir daz ob genant gotshavs ze Raitenhaslach alle zeit fv^edern wellen vnd im seinev recht meren vnd minder bechrenchen, stætigen wir im mit disem brief nach vnsers rates rat durch vnser selber, vnser vordem vnd vnsrer nachchomen hail vnd sælichait dev vorgeschriben recht des zehenten von vnsern chasten baiden ze Weilhart vnd ze O^eting, daz in der jærleich gevalle gar vnd gæntzleich von aller vnsrer gv^elt, chlainer vnd grozzer, dev dar avf geho^ert, ez sei getraide, pfenning, swein oder ander gv^elt, swelherlaye dienst ez sei, an alle vnser vnd vnsrer amptlævt irrvng vnd widerred. Swaz avch wir vnsers vrbors verchvmbern oder swie wir daz avs vnsrer gewalt antwurten, daz in den obgenanten gerichten ist gelegen, da von sol der zehent dem gotshavs dannoch gevallen, swer ez inne hat in allen den rechten, als ob ez avf vnser chasten dient. Vnd dar vber ze vrchvnd geben wir disen brief versigelten mit vnsern insigeln. Der ist geben ze Pvrchavsen, da von Christes gepvrt waren tavsent jar drevhvndert jar dar nach in dem zwaintzkisten jar, an sand Elspeten tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 636, S. 543-544