Ich Chv^onrat Awer, richter ze Chytzpvhel, tv^on chvnt allen, di disen brief sehent oder lesen ho^erent, daz Vlreich von Perpvhel^a, der des gotzhavs ze Raitenhaslach | aigen ist mit leib vnd mit gvet, in meiner herren von Raitenhaslach vanchnvss gewesen ist vmb savmcheit seines dienstes von dem gv^et ze Perpvhel^a vnd avch vmb andrev recht, dev er meinen herren von Raitenhaslach vnd dem gotzhavs da selb vber varen het. Vnd daz der selb Vlreich von Perpvhel^a sich mit meinen herren von Raitenhaslach vnd mit dem gotzhavs mit der beschaidenhait vertaidingt hat, daz von im, von seinen erben, di er ietzv hat, Hainreich vnd Vlreich, oder her nach gewinnet, von allen seinen frevnten vmb di vanchnvss vnd betwanchsal, da er inn gewesen ist, noch vmb dehainerlai sache des gotzhavs ze Raitenhaslach lævt vnd gvet ze Perpvhel^a vnd anderswa, swa es dez gotzhavs hat, vngelaidigt, vngemvet, vnweswært allen weis beleiben svllen; swelichen weis daz vber varen wurde, so habent sich drev vnd treizzich phvnt Saltzpurger phenning veruallen hintz den pv^ergen, di her nach geschriben Stent, vnd svllen avch die selben phenning von den selben pvrgen meinen herren von Raitenhaslach vnd dem gotzhavs an allev not taidinch gevallen. Vnd daz sint die porgen: her Gebhart von Velben vmb ain phvnt, Ott Mvnichawer vmb ain phvnt, Vasolt vmb ain phvnt, Tanqvard vmb ain phvnt, Dietrich Schafflvtzel vmb ain phvnt, Vlreich Ritschart vmb ain phvnt, Chvnrat vnd Andre von Perpvhel^a ietwederr vmb ain phvnt, Ott vnd Rapot von Sigelsperch ietweder vmb ain phvnt, Dietrich von Swartzach^b vmb ain phvnt, Ott vnd Hainrich vnd Nycla von Stochæch iesleicher vmb ain phvnt, Ott von Trætenpach vmb zwai phvnt, Nycla von Pochnaw vmb ain phvnt, Chvnrat von Weingrain vmb ain phvnt, Rapot von Walsenpach vmb ain phvnt, Chvnrat der Weiss von Chytzpvhel vmb ain phvnt, Levtolt von Tawern vmb ain phvnt, Hainreich Chirichpvhler vmb ain phvnt, Pavl von Griezzenaw vmb ain phvnt, Dietrich Po^enel vmb ain phvnt, Hermot vnd Andre von Æschelperch ietweder vmb ain phvnt, Hainreich von Entvelt vmb ain phvnt, Hainreich der Geiger von Chytzpvhel vmb ain phvnt, Chvnrat von Schrætenried vmb ain phvnt, Hermot vnd Chrafft von Pvhel ietweder vmb ain phvnt, Hainreich vnd Vlreich, Vlreichs svn von Perpvhel^a, ietweder vmb ain phvnt; vnd stet di porigschafft also, ob icht der oben verschriben taiding vber varen wurde, daz sich alain ledichlich hintz den porgen vervellt, vmb daz er sich hat schreiben haissen. Vnd wan Vlreich von Perpvhel^a niht aigens insigels hat, han ich durich Vlreichs vnd seiner porgen pet dev taidinch verschriben vnder meinem insigel. Dev taidinch sint geschehen anno domini M^o. CCC^o. vicesimo primo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 638, S. 545-546