Ich Chu^enrat der Sibrer, purger vnd hellinger in dem Hellein^a, vnd mein zwen svne Chu^enrat | vnd Hertneid^b wi^er verjehen vnd tv^en chunt an disem priefe allen den, die in ansehent, lesent oder lesen ho^erent, daz div peunt, div genant ist daz Gotzenvelt^c vnd hat geho^ert in den nidern hofe in dem Hellein^a, div vns vnser lieb herren her Hainreich der ersam abt ze Raittenhaslach vnd div sammvnge daselben verlihen vnd lassen habent zve vnser drin leiben alle jar vmb o^ehtzich phenninge Saltzburger mvnzse, di wi^er der von geben schullen ze dienst an sant Ru^eprehtz tage in dem herbest in den nidern hofe in dem Hellein^a. Div selbe pevnt ist frei vnd ledig nach vnserm tode, wenne wi^er drei nimmer sein oder swenne wi^er die vorgenantten ohtzich phenninge an sant Ru^eprehtz tage in dem herbest oder in vierzehen tage zehant der nach niht geben, so ist si auch ledig vnd frei von vns vnd geho^ert wider in den nidern hofe in dem Hellein^a mit allem dem reht vnd si vor geho^ert hat, versv^ehtiv vnd vnversv^ehtiv, vnd hat dehain vnser nachchunft noch vnser erben furbaz niht derauf ze sprechen noch chain reht derauf ze haben. Daz daz also stete vnd vnzebrochen dem vorgenantten gotzhaus ze Raittenhaslach vnd i^erem hofe in den Hellein^a von vns beleihe vnd von vnsern erben vnd von aller vnser nachchumft, darvber geben wi^er in disen offen priefe mit hern V^elreichs dez Paizzen anhangvndem ynsigel versigelt, der do rihtter in dem Hellein^a waz vnd nach vnser pet sein ynsigel an den prief geleit hat im an schaden, vnd mit meinem Chu^enratz dez Sibrer ynsigel auch versigelt, da wi^er vns Chu^enrat vnd Hærtneid^b vnder verpinden mit vnsern triwen, wan wi^er dannoch niht aigener ynsigel heten. Der prief ist geben nach Christes geburt vber driuzehen hvndert jar darnach in dem æht vnd zwainzigisten jare, an sant Johannes ewangelisten tage als er in daz ole wart gesatzte.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 671, S. 572-573