Ich Fridreich der Awer, ze den zeiten richter ze Julbach, vergich vnd tven chunt an disem offen brief allen | den, di in ansehent oder horent lesen, daz Wolf hart der Mayer von obern Julbach, Fridreichs sv^en aus dem Raw^et, vnd sein hausfrawe Chu^eningvnt vnd ir paider eriben, sv^en vnd tochter, di nv lebent oder noch chunftig werdent, i^er gvet datz Perchaim habent chæv^oefleich ze chauffen gegeben den herren vnd dem gotzhavs ze Rætenhaslach fver æin vræiz vnd ledigiz aygen vnd hat auch in daz selb aygen mit Hæinreichs des Plvemelpergers hant, der des vorgenanten gvetz rechter salman was, vor dem rechten auf gegeben, als ertailt ward. Avch schol der vorgenant Wolfhart des ê genanten gvetz ze Perchæim gewer sein jar vnd tag vnd Hæinreich der Plumelperger trager sein auch jar vnd tag der obgenanten herren vnd des gotzhavs ze Ræitenhaslach, ob in sein du^erft wiert. Daz hat Wolfhart gehæizzen vnd der ob genant salman gelubt vor dem rechten, als ertailt ward. Des sint zevg: her Pob vnd her Eb di Hocholtingner, der Sweikker der Seifristorfer, Chu^enrat der Seyfristorfer, Hertel der Scol, Albrecht von Tann, Wolfhart der Winichingner, Wernhart der Oder, Vlreich der Smid, Fridreich von Pvech, Chu^enrat der Hveber da selben, Chu^enrat der Tytler vnd ander erber læv^et. Daz di red vnd di tayding stæt vnd vnuerchert beleiben, darv^eber zv einem vrchv^ende gib ich den herren vnd dem gotzhavs ze Ræitenhaslach disen offen brief versigelt mit meim insigel. Der brief ist geben, do man zalt von Christes gepu^erd tausent jar drev hvndert jar in dem zwai vnd dreizzikisten jar darnach, an dem andern mittichen nach dem lyechtmisse tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 687, S. 585-586