Wir Heinr(ich) der elter von gots genaden pfallentzgraf ze Reyn vnd hertzog in Baieren enbieten vnserm vitztum, | richtern, allen vnsern amptlævten, allen vnsern edeln lævten vnd gemainlich allen den, di in vnserm lande gesezzen sind, vnser huld vnd alles gu^ot. Wir lazzen evch wizzen, daz wir dem ersamen abtt von Raytenhaslach di genad haben getan, daz wir in, sein gotshavs, sein lævt vnd gu^ot, swa er daz hat, v^eberal in vnserm lande oder avzzerthalben vnsers landes, in vnsern besvndern schirm vnd genad genomen haben, vnd haben in, sein lævt vnd sein gu^ot, ietzv^o den chrieg avzz vnd avzz fu^er vns vnd fu^er di vnsern versichert. Vnd da von wellen wir vnd gebieten ev allen vestichlichen bei vnsern hulden, daz ir den selben abtt, sein lævt vnd sein gu^ot mit nichtev irret, enget noch beswært mit dhainen Sachen, vnd beschirmt in von vnsern wegen an seinen lævten vnd gu^oten, swa er daz hab, vnd lat in seinen frvm da mit schaffen, als ir vnser grozz swær vngenade wellet vermeiden. Vnd dar||
v^eber ze einem vrchv^ende geben wir im den brief versigelten mit vnserm insigel. Der ist geben ze Lantshu^ot millesimo CCCmo. tricesimo secundo, des mitichen nach sand Jacobs tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 688, S. 586-587