Ich Ekkhart von Tann, hern Niclaus sun, dem got genade, vnd mein hausfrav^o frav^o Wandel vnd vnser paider erben verjehen offenbar an disem brief I allen den, di in sehent oder ho^erent lesen, daz wir mit gu^oter verdachtnu^oss vnd mit gu^oetem willen nach vnserr friunt rat gegeben hawen vnser gu^oet, daz gehaizzen ist Œde vnd ist gelegen inTitmaninger^a gericht, daz vnser rechtz vnd freyz æigen was, den ersamen vnd gaistlichen hern abbt V^olrichen vnd der sammunge ze Raitenhaslach vnd irm gotshaus, bisu^oecht vnd vnbisu^oechtt, mit allen den rechten vnd nvtz vnd gewer, als wir iz selber vnd vnser vordem inne gehabt hawen, vnd hawent si vns dar vmme gegeben vnd in geantwurtt mit volliger nvtz vnd gewer einen hof vnd ein mu^ol, div^o da zu^oe geho^ert, ze Sighartinge^b. Wir verzeichen vns auch des vorgenanten gu^oetes datz O^ede, daz wir noch chain vnser erbe furbaz chain wortt oder ansprach dar nach hawen sullen; avch verhaizzen wir, daz wir des obengenanten gu^oetes datz O^ede der vorgeschribenn hern vnd des gotshauss von Raitenhaslach gewer sullen sein, swo in sein not geschieht vnd swann si daz an vns vodernt, als lange als æigens recht ist vnd als daz lantrecht stet in dem gerichtt, da iz inne gelegen ist. Wer awer, daz wir dar an saumich wem vnd ir gewer nicht weren, swelichen schaden si vnd ir gotshaus des nemen, den æin ir amptman an ir stat mit seinem ayde mage bisteten, den sullen wir in ab tu^oen gar vnd gentzlich, vnd ob in dar vmme verzogen wu^orde werltleich recht, so geben wir in vo^elligen gewalt, daz si danne den selben schaden vnd ablegum an vns vodern mit gaistlichem rechten. Auch hawen wir binent, daz daz offtt genant gu^oet O^ede gelten sol jerlich fu^omfzehen metzen chorens vnd einen mutt habern vnd sechzich pfenninge für ein swein vnd^c zwen metzen waitz vnd ein halibes pfunt fur diu stift, vnd sullen sich di offtt genanten hern von Raitenhaslach erfaren von hinn vntz auf sand Marteins tache, der schierst chomt, ob iz den selben dienst wol mu^oge vertragen oder nicht, vnd swaz iz sein nicht mo^echtt vertragen, daz sullen wir in widerlegen mit anderm gelt inner jars frist nach fier mann rat, di wir paidenthalben da zu^oe sullen nemen. Der taidinge sind ziuge: bru^oeder Vlrich priol, bru^oeder Christan, bru^oeder Vlrich der Scharsacher, bru^oeder Peter oberr chellner, bru^oeder Ott guster, brueder Berichtolt subpriol, bru^oeder Reicher chamrer, bru^oeder Frid(rich) vnderr chelner, brueder Hinr(ich) von Hall, munich ze Raitenhaslach; Reicholf vnser amptman, Hinr(ich) der probst von Maierhoven, Winther der probst, V^olr(ich) von Aw^oe, Frid(rich) von Puchsinge, Hinr(ich) der Sneider vnd ander getriv leu^ot genv^oege. Vnd daz in daz also stet vnd vnuerchert bileib von vns vnd vnserr nachchumft, geben wir in vnd irm gotshaus disen brief ze vrchunde versigelten mit des ersamen hern hern Wernharts des Grans^d insigel, der daz nach vnserr gebet dar an gelegt hat ime an schaden, vnder dem wir vns gentzlich verpinden, vnd mit meinem insigel des obengenanten Ekkharts von Tann. Daz ist geschehen, du^oe von Christes gepu^oertt worn vergangen driuzehen hundert jar in dem vierzigistem jar dar nach, an dem auffert tage.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 704, S. 602-603