Ludowicus dei gracia Romanorum imperator semper augustus universis presentes litteras inspecturis graciam suam cum noticia subscriptorum. Dum imperialis | serenitas personas ecclesiasticas potissime sub sacra religione degentes in suis libertatibus, iuribus et honoribus manutenet et ipsarum iustis votis annuit et consentit benignius, ipsius honor crescit in terris et premia sibi conparat in excelsis. Devotis igitur et racionabilibus^a peticionibus honorabilium et religiosorum virorum . . abbatis et . . conventus monasterii in Raitenbaslach devotorum nostrorum dilectorum favorabiliter annuentes ob divini cultus augmentum, sacram religionem, que in dicto monasterio viget laudabilis, vitam et conversacionem eorum honestam, elemosinas multas, quas erogant, hospitalitatem, quam servant, necnon ob alia multiplicia opera caritatis, que ipsi fratres dicti monasterii faciunt et exercent cottidie in animarum divorum augustorum predecessorum nostrorum necnon . . ducum Bawarie progenitorum nostrorum illustrium remedium et salutem, ipsis et monasterio eorum predicto omnia iura, libertates, immunitates et gracias ac omnia et singula privilegia omnesque gracias in eisdem contentas, sicut iuste et racionabiliter ipsis et eorum monasterio a divis imperatoribus et regibus Romanorum predecessoribus nostris et eciam ab illustribus . . ducibus Bawarie progenitoribus nostris sunt tradita vel tradite, concessa seu concesse, indulta graciosius vel indulte, de innata nobis clemencia approbamus, ratificamus, roboramus, immo innovamus et presentis scripti patrocinio confirmamus, mandantes sacri imperii fidelibus universis necnon . . vicedominis, . . iudicibus ac omnibus et singulis officialibus et fidelibus ducatus nostri Bawarie nostre gracie sub obtentu, quatenus . . abbatem et . . conventum predictos et ipsorum monasterium predictum in dictis graciis omnibus et singulis non molestent, gravent aliquatenus vel perturbent nee sinant eos vel eorum monasterium contra dictas gracias molestari, gravari quomodolibet aut turbari, sed nostro nomine ipsos defendant, manuteneant et conservent. Nulli ergo omnino hominum liceat paginam hanc nostre confirmacionis infringere vel ei ausu temerario contraire. Si quis autem hoc attemptare presumpserit, preter nostre maiestatis indignacionem penam viginti librarum puri auri irremissibiliter, tociens quociens contrafactum fuerit, se noverit incursurum, quarum medietatem fisco nostro, reliquam vero passo seu passis||
iniuriam volumus applicari. In cuius confirmacionis nostre testimonium presentes conscribi nostreque maiestatis sigillo iussimus conmuniri. Datum Burkhusen^b decima die mensis septembris anno domini millesimo tricentesimo quadragesimo primo, regni nostri anno vicesimo septimo, imperii vero quartodecimo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 709, S. 607-608