Ich Margret von Ro^er, ich Wu^ellfinch von Golldekk, Agnes mein hausfraw^e verjehen fu^er vns vnd all vnser erben vnd tu^en chu^ent offenbar mit dem bri^ef allen den, di in sechent oder ho^erent | lesen, daz wir mit veraintem vnd wolbedachtem mu^et vnd gu^etleichem vnserm willen dem beschaiden manne Charlein dem ju^ongen Velber, purger ze Pu^orchausen, seiner hausfraw^en vnd allen seinen erben cheu^efleich vnd redleichen ze cha^euffen gegeben haben vnser zwen ho^efe ze Hofschalichen in Halspacher pfarre vmb vier vnd zwaintzich pfunt Regenspu^orger pfenning, der si vns scho^en gentzleichen verrichtt vnd gewert habent mit beraiten pfenning. Vnd su^ellen si di selben ho^efe inne haben, handeln vnd niezzen mit allen den rechten ze holtz, ze uelde, ze waide, ze wazzer vnd gemainleichen mit allen den ern, rechten, baidiv chlo^einen vnd gro^ezzen, swi di genand sind, di von den ho^efen bechoment vnd becho^emen mu^egen, besu^echten vnd vnbesu^echten, vnd in aller der mazze, als wir di ho^ef vntz auf den tag hevt selben gehandelt, geno^ezzen vnd inne haben gehabt; allso auzgenomenleichen, chauffen wir di vorgenanten zwen ho^efe her wider von in von dem tag hevt, daz ist von vnser frawen tag ze der li^echtmesse, v^ebere drew gantzew^e jar vnd auch in den selben drein jaren alle jar jerleichen an dem li^echtmesse tag vmb di vorgenanten vier vnd zwaintzich pfunt Regenspurger pfenning, di ie ze der vrist danne genge vnd geb sind, vnd sullen si vns ie ze der vrist nicht versten, si geben vns di vorgenanten zwen ho^efe vmb di selben pfenning her wider ze chauffen; vnd su^ellen auch ie ze der vrist di ho^efe her wider von in cha^euffen mi^er vmb vnser aigenew hab, daz wir dar vmb weder in gehaime noch offenleichen di ho^ef gein ander niemant anderswo verchumern noch verchauffen su^ellen noch enmu^egen. Wir haben in auch di vorgenanten hof auf gegeben mit dez herren handen, da von wir si ze lechen haben gehabt, vnd su^ellen der auch ir gewern sein, als lechens recht ist. Teten wir dez nicht, swittann schaden si dar inne nement, wie der genant wer, den ir ains bey seinen triwen mag gesprechen, den su^ellen wir in ab tu^en gar vnd gantz vnbered vnd vnberecht iren Worten ze gelauben an aide vnd an allen iren schaden vnd su^ellen den datz vns vnd datz aller vnser habe haben. Chauften wir aber di vorgenanten zwen ho^ef von in her wider nicht in den vorgenanten drein jaren alle jar jerleichen ie an dem li^echtmesse tag, als oben verschriben ist, schu^ellen wir vnd auch si vns baidenthalben zwen gemain man, di purger ze Purchausen sind, dar nach nemen vnd swaz vns di her zu^e haizzent geben, daz su^ellen wir baidenthalben vergu^et haben vnd da bey beleiben triwleichen an gever vnd su^ellen auch da wider nichtes nicht reden. Vnd su^ellen wir vnd all vnser erben vnd nachomen hintz in, allen seinen erben vnd nachomen vnd auch hintz den vorgenanten ho^efen ewichleichen dhain ansprach nimmermer haben noch gewinnen, vnd su^ellen auch di inne haben als ander ir gechauftew^e aigenew^e hab vnd lechen. Wir versprechen vnd gehaizzen in auch mit disem bri^ef vnd mit vnsern triwen in aydes weiz, also sta^et ze haben vnd war ze lazzen an alle arig liste allez, daz verschriben wi^ert an disem bri^ef; vergazzen wir vns aber indert gein in dar inne vnd in mit dhainen sachen indert v^ebergriffen der gelu^ebde vnd pu^ende, als wir in di oben an dem bri^ef versprochen haben, daz wer an recht oder mit rechtten baidew gaistleichem oder wertleichem, daz su^ellen si in allen leuffen vnd wegen allzeit behabt haben vnd wir verloren. Swer auch disen bri^ef inne hat von iren wegen, dem selben oder den selben sein wir allez dez sulldig vnd gepu^onden, daz oben ist verschriben. Daz in daz allez stet, gantz vnd vntzebrochen beleih, dar v^eber ze einem vrchu^onde der warhaid geben wir in disem bri^ef mit meinem Margreten von Ro^er vnd mit meinem Wu^ellfinch von Golldekk anhangunden insigeln versigelten, dar vnder sich mein hausfraw^e Agnes, all vnser erben vnd nachomen sich verbindent mit iren triwen allez daz sta^et ze haben vnd ze uolfu^eren, daz oben ist verschriben. Daz ist geschehen, don man zalt von Ghristes gepu^ertt drewtzehen hundert jar dar nach in dem fu^emfe vnd viertzigistem jar, an vnser frawen tag ze der lichtmesse.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 725, S. 622-624