Ich Magens der alt Wu^olp vergich fu^or mich vnd fu^or mein hau^osfraw^en vnd fu^or alle v^onser eriben, di wi^er haben vnd noch I chv^omftichleichen gewinnen, vnd tu^en chu^ont offenbar mit disem bri^ef allen den, di in ansehent oder ho^erent lesen, daz ich mit verdachtem mu^ot vnd mit meinem gu^oten willen v^onser vrawen vnd i^er gotzhau^os ze Rattenhaslach^a vnd meinem herren abt Vlr(eich) vnd seinem conuent da selben Ofnein, di Engelbrecht hau^osfrawe von Albaren, dev^e selb vraw^e meins vater herren Magensen des Wu^olppen waz vnd mein, di selb egnant vrawe Ofnein mein egenanter vater dem vorgnanten gotzhau^os geben hat fu^or ai^egen, vnd swaz chv^omftichleich von i^er cha^em, di heu^ot lemptich sind vnd noch chv^omftichleichen von dem gesla^echt cho^ement, es sein man oder weib, daz selb wil ich egenanter Wu^olp, mein hau^osfraw^e vnd alle v^onser eriben, di wi^er haben vnd noch chu^omftichleichen gewinnen, sta^et haben. Vnd haben au^och hintz dem vorgenanten geslecht, waz von vrawen Ofnein cho^emen ist vnd noch chu^omftichleichen wi^ert, nimmermer nicht ze sprechen, weder nach i^er leib noch nach i^er gu^ot, vnd sind ledichleichen v^onser vrawen ze Rattenhaslach vnd des vorgenanten i^er gotzhau^os. Es ist au^och ze merchen, dev mu^ol ze Schospach, di ê lehen ist gewesen von meinem oft genanten vater vnd di daz oft genant gotzhau^os la^ong mit nu^otz vnd mit gewerd^b inne gehabt habent vnd noch habent, der selben lehenschaft verzeich ich mich fu^or mich vnd fu^or mein hau^osfraw^en vnd fu^or alle v^onser eriben, di wi^er haben vnd noch chu^omftichleichen gewinnen. Des sint ta^eidinger gebesen: her Vlr(eich) der Schillicher der preiol, her Vlr(eich) der O^eler der obernchellner ze Rai^etenhaslach; H(ainreich) der alt En, Ja^ons der Pu^orger, Ja^ons der Schillicher^c, Ch(unrat) der Feu^oichtner, H(ainreich) der Scho^enschu^oster vnd ander erberg leu^oit genu^och. Daz in daz alles sta^et vnd v^ontzebrochen von mi^er peleib vnd von meiner hau^osfraw^en vnd von allen v^onsern eriben, also vor geschriben stet, gib ich in disen offen prif versigeltten mit meinem a^eigen anhangv^onden insigel. Vnd ist daz geschehen, do man zalt von Christes gepu^ort dreu^otzehen hv^ondert jar in dem sechs vnd vi^ertzichkisten jar, an dem li^echtmizz tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 729, S. 626-627