Ich Gebhart der Pachaimer, mein hausfraw vnd vnser paider erben, dy^e wir haben oder noch gewinnen, wir verjehen offenbar an disem brief vnd tu^en chund allen den, dy in sehent oder ho^erendt lesen, daz wir vns gar vnd ga^enczleich verricht haben mit dem erbern herren abbt ze Raytenhaslach vnd mit aller sammung dez selben conuencz da selben vmb dy ansprach vnd chlag, dy wir hincz in gehabt haben von dez Ma^eula^evzschen mu^el in dem Grassawertal. Do haben wir vns mit in vmb verricht nach erberen la^eut rat vnd nach vnser frevndt rat, also daz wir noch chain vnser eriben noch nachko^emen fu^erbaz nymmermer nichcz ze sprechen schullen haben hintz dem obgenanten abbt von Raytenh(aslach) noch hintz seinem goczhaus weder mit recht noch an recht. Wa^er daz wir dar vmb hincz in icht spra^echen mit recht oder an recht, daz schol der obgenant abbt von Raytenhaslach vnd sein conuendt vnd goczhaus alles gehabt haben gein vns vnd wir alles verloren haben gein in an aller stat auf gaistleichen rechten vnd auf weltleichen gericht, wo sy disen brieff fu^er tragent. Daz im dem obgenanten abbt von Raytenhaslach, dem conuendt, dem goczhaus daz also sta^et vnd vnzeprochen von vns allen vnd allen vnsern eriben vnd nachko^emen beleib, dar vber zw einem vrchund der warhait geben wir in disen vnsern offen brieff versigelten mit Ekharcz von Hauchenstain anhangunden insigel, der dw gewaltiger pfleger ze Maricharczstain in dem Grassawertal waz vnd der vns sein insigel durch vnser pet willen hat^a im vnd allen seinen erben an schaden, wan wir du nicht aigner insigel heten, vnd haben vns mit vnsern trevn verpunden vnder dez egenanten Ekharcz insigel allez daz war ze lassen vnd ze volfu^eren, daz oben an dem brieff geschriben stet. Der taiding sind zeugen: Fridreich der Schreiber richter ze Traunstain, Heinr(eich) Fro^eschel richter ze Halle, Rudolf der Schikke, Virich Chastner, Fridrich von Perenha^eppen vnd ander erberg la^eut genu^eg. Der brief ist geben an sand Gallen tag, do von Christus gepurd ergangen waren tausent jar dreuhundert jar in dem funf vnd vierczigistem jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 728, S. 625-626