Ich brueder Heinr(ich) hofmeister dez ernwirdigen fu^orsten ertzb(ischof) Ortolfs ze Salzburch^a, legat dez stu^ols ze Rom, ich Virich der | Paizz, richter in dem Hallein, tu^on ze wizzen in disem brief offenbar allen den, di in sehent, lesen oder ho^erent lesen, daz ein chrieg waz zwischen brueder Niclas dez obernmaisters vnd brueder Otten des nidernmaisters in dem Ha^ellein vmb ein schaftricht in dem obernperig, der zudem nidernhof geho^ert. Den chrieg liezzen si an vns ga^entzlich, wie wir den berichten zwischen ir, daz scholten sibaidenthalb sta^et haben; vnd der obermaister het da zue vollen gewalt von dem ersamen herren hern Ha^ertneiden dem tu^ombrobst vnd von dem capitel ze Salzburch^a vnd von abt Vir (ich) vnd der samenung ze Salmansweiler; auch het der nidermaister vollen gewalt von abt Vlr(ich) vnd von der samenung ze Raitenhaslach. Nu haben wir den chrieg zwischen in also bericht, daz der obermaister sechzik chlafter in der gaistlicher herren land dez^b probstes vnd dez capitels von Perchthersgadem^c mit sinchwerchen auf der want ze der tenken hant sol versieden vnd verwurchen auf dez nidernhofs schaftricht in dem obernperig vnd sol zue denselben sinchwerchen durich dez nidernhofs schurf sein wazer fu^eeren dem nidernhof an schaden, dem sol er auch seins wazzers nicht nemen. Ez sol auch der obermaister dev schaftricht vnd den schurf von der zeit, vnd er anhebt ze wu^erchen, helfen ru^osten vnd auf haben allen weiz mit sein selbs arbaitern vnd mit halbem Ion. Vnd der nidermaister sol auch seinen halben tail der schaftricht vnd dez schurffs mit seinen arbaitern vnd mit halbem Ion auf haben. Auch sol der nidermaister dev rechten want in demselben perig ga^entzlich ainnutzen vnd wu^orchen. Wann auch der obermaister di obgenanten sechzich chlafter mit sinchwerichen vernu^ezet vnd verwu^erchet, so schol er chain wersloch da machen vnd sol auch furbaz mit der schaftricht vnd mit demselben perig nicht mer haben ze schaffen vnd sol auch dev schaftricht vnd den schurf nicht mer helfen ru^esten. Auch haben wir gesprochen, ob ain hofmeister fu^or den andern fu^oer in den sechzich chlaftern, da sol er ru^osten mit sein selbs arbaitern vnd Ion dem andern an schade. Ez hat auch der nidermaister einen theil geworicht vnd versiecht sich der obermaister, daz im derselb theil nutz sei, den sol er versieden dem nidernmaister an schaden vnd sol auch den arbaitern daz Ion geben, di emaln daran geworicht habent. Der taiding sind zeug: Chunr(at) der Sybrer, Vlr(ich) von sand Veyt, Vlr(ich) Spa^ech, Chunr(at) Nater, Fridr(ich) Redrer, Heinr(ich) auf der Mawer, der Haymer, Seybot Draschel, Hein(rich) Chnau^ezzel, Chunrad Walicher, Vlrich der Mercher, Vlrich Swertzer, Chunr(at) von Du^errenberch vnd Vlrich der Chlouogel. Daz di taiding also sta^et vnd vnzebrochen zwischen in beleiben, geben wir in disen brief versigelten mit vnser baider anhangenden insigeln vns selb an schaden, dar vnder si sich habent verpunden allez daz sta^et ze haben, waz an disem brief von vns verschiden vnd vertaidingt ist^d zwischen in. Der brief ist geben, don man zalt von Christes geburd dreuzehen hundert jar da nach in dem sechs vnd viertzgistem jar, an sand Luceyn tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 732, S. 628-630