Ich Margret von Ro^er vergich vnd tu^on chu^ont offenbar an disem brief allen den, di in sehent oder ho^ernt lesen, wan mein liebew muterl fraw^e Sophey von Walde | selig mit veraintem vnd wolbedachtem mu^ot an ir lesten zeiten, do si ez wol macht getu^on, ze einem ewigen hail vnd selgera^et ir vnd allen iren voruordern vnd nachchomen schu^ef dem gotshaus vnd dem conuentt ze Raitenhaslach dreizzig pfunt Saltzbu^orger pfenning, dar zv^e schu^offen mein lieb sv^on her Vlreich vnd Ortlieb selig an ir lesten zeiten, do si ez auch wol mochten getu^on, in vnd auch iren voruordern vnd nachchomen ze einem ewigem selgra^et dem êgenantem gotshaus vnd dem conuentt ze Raitenhaslach datz mir dreizzich pfu^ont Saltzburger pfenning, daz werdent also sechtzzig pfunt Saltzburger pfenning, der ich dem gotshaus vnd dem conuentt ze Raitenhaslach von iren wegen schuldich beleib vnd gelten sol. Vnd wan ich si der pfenning gern mit beraiten pfenning hilfleichen vnd fu^orderleichen gewert hiet, chund noch mochtt ich der weg nicht ervinden, da mit ich daz gelt hiet||
gestalt, vnd bin mit veraintem vnd wolbedachtem mu^ot vnd mit gu^etleichem willen mein vnd auch dar zv^e mit Wullfings dez Goldekker willen, wizzen vnd gunst vnd auch nach seinem rat, der mein eninkchel Angnesen hat vnd dem ich ander mein hab gegeben vnd gemachtt han nach meinem tod, bin vberain cho^emen also, daz ich dem vorgenantem gotshaus vnd dem conuentt ze Raitenhaslach fu^or die selben sechtzzikch pfu^ont Saltzburger pfenning redleichen vnd chæufleichen ze chauffen gegeben han mein zwen ho^ef ze Hofschalichen, di bayde rechtes freyes aygen sint, mit allen den eren vnd nu^otzzen, di dar zv^e geho^ernt, ze holtz, ze velde, ze wayde, ze wazzer vnd gemainchleichen mit allen andern den rechten, swie di von alten rechten vnd alter gewonhait dar zv^e geho^ernt vnd da von bechoment vnd becho^emen mu^ogen, besu^ochten vnd vnbesu^ochten, vnd als mein voruodern vnd ich die selben ho^ef vntz auf den tag hevt gehandelt, genozzen vnd inne habent^a gehabt, also han ich dem gotshaus vnd dem conuentt ze Raitenhaslach mit der selben gu^olt vnd mit den rechten der selben ho^ef heut ze tag ze nu^otzz vnd ze gewêr gesatzzt vnd sullen di inne haben, bestiften vnd entstiften als ander ir vrbar, vnd sol der ir gewer sein, als aygens vnd dez landes recht ist, vnd sol auch in di staet dar vber tu^on, di ze recht dar vber geho^ernt. Also auzgenomenleichen, chauffich oder der vorgenant Wulfing der Goldekker di egenanten ho^ef her wider von in von dem liechtmesse tag, der nu schirst chu^omt, vnd dar nach vber vier gantzzew jar alle jar in den selben vier jaren viertzehen tag vor dem liechtmesse tag oder viertzehen tag nach dem liechtmesse tag, sullen si mir vnd dem offtgenantem Wu^olfing dem Goldekker nicht versten auf den selben tag, si geben vns di egenanten ho^ef vmb di vorgenanten sechtzzig pfunt Saltzzburger pfenning, di danne gib vnd gæb sint, her wider ze chauffen; chauffen aber ich oder der genant Wulfinch der Goldekker der ho^ef auf den selben tag von in her wider nicht, so sullen ich, der genant Goldekker, ander mein erben, frewnt vnd nachchomen hintz den vorgenanten hofen, hintz den rechten vnd der gu^olt, di dar zv^e geho^ernt, vnd auch hintz dem gotshaus vnd dem conuentt ze Raitenhaslach ewichleichen dar vmb dhain ansprach nimmermer haben noch gewinnen, weder mit recht noch an recht, gaistleichen oder werltleichen. Man sol auch wizzen, daz die vorgenanten ho^ef mit aller ir gu^elt, diensten vnd nu^otzzen dienen sullen dem conuentt ze Raitenhaslach in ir pittantzze vnd sullen die vorgenanten herren vnd der conuentt ze Raitenhaslach alle jar jærleichen vnd ewichleichen meines lieben wirtes herren Heinreichs von Ro^er sæligen vnd andrer meiner voruordern vnd nachchomen jartag begen an dem andern tag nach sand Vlreichs tag mit einer vigilii an dem abent vnd dez morgens mit einer messe, vnd an dem selben jartag sol man ewichleichen von der gu^olt, di von den hofen chu^emt, einem iegleichem herren geben ein trinchen wælischs weins, ein weizzes bro^vt vnd zway stu^okch gesultzzter vischs. Vnd swelhes jares an irm jartag daz den herren versaumet wu^ort, daz man in dez nicht gæb, swaz danne von den hofen daz jar, dar inne in der trost nicht gegeben ist, dienstes vnd gult chu^emt vnd chomen mag, den selben dienst allen sol dez selben jares der abbtt von Salmansweiler nemen vnd seinem conuentt hin haim fu^orn. Vnd ob ich vnd der obengenant Wulfinch der Goldekker die vorgenanten ho^ef her wider von in chauffen, so sol man den herren vnd dem conuentt die vorgenanten sechtzzikch pfunt Saltzzburger pfenning an aygen vnd vrbar legen in ir pittantzz, vnd daz si ewichleichen alle jar an vnserm jartag da von haben den trost, als der oben ist verschriben. Vnd dar vber ze vrchund gib ich in den brief mit meinem vnd ze einer pezzern stætichait mit dez offt genantem Wulfings dez Goldekker anhangenden insigeln versigelten. Dez sint zeug: her Vlreich ze den zeiten prior, her Peter der Newmaister, payd mu^enich ze Raitenhaslach; Fridr(eich) von Insprukk, Heinr(eich) der Riser, Berchtold der Zinkk, Fridr(eich) der Zinkk, Vrban der Schreyber, Chvnr(at) der Eider, alle purger ze Purchausen, Wernher der Talweger, Vlreich von Rechpokching vnd ander erber læwt genu^og. Daz ist geschehen, do man zalt von Christes gebu^ortt tausent jar drewhundert jar dar nach in dem æcht vnd viertzzigistem jar, an aller heyligen tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 739, S. 636-638