Ich La^ewtl des alten Formaister sun vnd mein hawsfraw Margret vnd alle vnser erben, dy wir yeczund haben oder fu^erbaz gewinnen, verjehen vnd tu^en chund offenbar an disem brieff allen den, dy in sehent oder horent lo^esen, daz wir mit vergintem vnd wolgedachtem mu^et vnd mit gu^etlichen vnserm willen chauffleichen ze chauffen haben gegeben dem erberen mann Heinr(ich) dem Riser, purger ze Purch(awsen), seiner hawsfrawn vnd iren erben vnser hu^eb dy Hu^elghu^eb ze Erhartstorff, dy rechtes freyes aigen ist, mit allen den rechten, eren vnd nu^eczen ze holcz, ze velde, ze wayde vnd cze wasser vnd gemainchkleichen mit allen den rechten, chlainen vnd grossen, dy dar czu gehorent vnd da von becho^ement oder becho^emen mu^egen, besu^echten vnd vnbesu^echten, alz vnser vorvordern vnd wir dy selben hu^eb gehandelt, genozzen vnd inne haben gehabt, vmb czwainczig pfund haller vnd pfenning, der sy vns gar vnd ganczlichen verricht vnd gewerdt habent, also daz wir, vnser erben, vnser frewndt vnd alle vnser nachko^emen hincz dem vorgenanten Heinr(ich) dem Riser, hincz seiner hawsfrawn, hincz allen iren erben vnd iren nachko^emen vnd auch hincz der vorgenanten hu^eb vnd hincz den rechten vnd nu^eczen, dy dar czu geho^erent, ebichleichen chain ansprach nimmermer gehaben noch gewinnen su^ellen noch mit chainerlay anvallung anva^ellen, wye wir vns der erdenkchen oder erfu^enden mo^echten werden. Wa^er aber, daz in an der obgenanten hu^eb yemandt dhain chrieg oder vnderpru^eche ta^ete, von welcherlay irrung oder anvallen daz gescha^ech, dar an su^ellen wir sy vertreten vnd versprechen, alz dez landes recht auf freyem aigen ist. Ta^eten wir dez nicht, welhen schaden sy dez nemment, daz su^ellen sy haben auf vnserm leib vnd gu^et, dar zu auf vnser aller||
ha^eb, besu^echt vnd vnbesu^echt, vor allen andern la^ewtten vnd vnsern geltern. Wer auch den brieff mit ir willen vnd wissen inne hat vnd vns da mit mandt, der selbe oder dy selben habent alle dy recht auf der obgenanten hu^eb in aller der mazze, alz oben vmb sich selber verschriben ist. Wey der ta^eyding vnd dem chauffe gewesen sind: herr Frid(rich) von Insprukh, Seyfrid der Iring, Seybolt von Hu^ekking, der Plv^em von Wankchausen, Hainr(ich) von Ga^enchking, Chainr(ad) von Gna^edlazz vnd ander||
erberg lew^et genu^eg. Daz in daz also sta^et, gancz vnd vnczeprochen beleib, dar v^eber zu einem vrchunde geben wir in disen brieff mit her Lud(weig) aus dem Holcz anhangunden insigel versigelten, der daz nach fleizziger vnserr pet im vnd allen seinen erben an scha^eden dar an gelegt hat, dar v^ender wir vns, alz wir oben benant sein, mit vnsern trewn verpinden, alles daz sta^et ze haben vnd ze volfuren, daz oben ist verschriben. Der geben ist an sand Michels tag Mo CCC^o quadragesimo octavo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 738, S. 635-636