Wir bru^oder Vlreich abbt vnd alle di sammung dez chlosters ze Raitenhaslach verjehen an disem brief I allen den, di in sehent oder ho^erent lesen, daz vns der erberig beschaiden man Johannes der Galle, purger ze Mu^oldorf, vnd sein hausfrawe Lucia mit willen vnd gu^onst aller ir erben, do si ez wol getu^on mochten, habent gegeben vnd geschafft ze rechtem selgra^et ir aigens gu^et, daz genant ist daz Gu^omppel vnd nahen gelegen ist pei der stat ze Mu^oldorf, mit allen nu^otzen, eren vnd gu^olt, besu^ocht vnd vnbesu^ocht, daz dar zu^o geho^ert, als si is selber inne habent gehabt, mit der beschaidenhait, daz wir ir baider jartag Johanses vnd Lucey, di oben genant sint, alle jar begen^a sullen nach vnsers ordens gewonhait mit vigilii vnd mit mess dez na^echsten tags nach sand Thoman tag vor weynachten, vnd sol dez selben tages ieder herr vnd bru^oder getro^est werden mit einem trinchen wa^elischs weins, mit zwain stu^okchen gesultzzter visch vnd mit einem weissen pro^et von der gu^olt vnd von dem dienst, der von dem obengenanten gu^et gevallen vnd becho^emen mag jerleich. Vnd wa^er, daz chain prest auf daz vorgenant gu^ot cha^em von scha^over, pises oder von landes vrleug, daz wir dez dienstz von dem genanten gu^et nicht gehaben mochten an geva^er, dez selben jares sullen wir dez di^enstz dem conuent, als oben verschriben ist, nicht suldikch ze geben sein. Wa^er aber, daz wir sa^ovmikch wa^eren, daz wir den di^enst an dem jartag, als oben verschriben ist, swenn er gevallen mag, vnserm conuent nicht geben, so sol vnserr vater der abbt von Salmansweiler dez selben jares allen den nu^otz vnd dienst in nemen vnd hin haim pringen seinem conuent, der von dem offt genanten gu^et^b gevallen mag, daz sein conuent da von getro^est wirt, vnd sol daz furbaz anderev jar vnserm conuent an allen schaden sein. Daz in daz also sta^et vnd vnzebrochen beleib; geben wir in ze vrchu^ond disen brief mit vnsern anhangenden insigeln, der geben ist, do von Christes gepu^ort waren tausent jar drevhundert jar dar nach in dem æcht vnd viertzigistem jar, an sand Thomas tag vor weichnachten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 740, S. 638-639