Ich Jans von Prettach vergich vnd tu^en chunt allen den, die disen brief lesent oder ho^erent lesen, die nv lebent vnd hernach | chu^enftich sind, daz ich mit gu^etem willen mit verdachtem mv^et zv der zeit, do ich iz wolgetu^en mocht, vnd mit meins pergmaisters hant Cholmans, zv den Zeiten amptman ze Radendorf der erbern gæstleichen herren von Melch, recht vnd redleichen ze einem rechten widerwæchssel gegeben han meinen weingarten, der do leit ze Chremse auf der hayde, dez fumf jeuch ist, da man alle jar von dient in den hof ze Radendorf fumf vnd sibentzich Wienner phening ze perchrecht vnd nicht mer, mit allem dem nvtze vnd rechten, alz ich in în perchrechtes gewêr her pracht han, den erbern gæstleichen herren abt Vlreichen vnd dem conuent gemainen ze Raitenhaslach vnd allen irn nachchomen fu^erbaz ledichleichen vnd vreyleichen ze haben vnd allen irn frumen da mit ze schaffen, verchauffen, versetzen vnd geben, swem si wellent, an allen irrsal. Vnd haben auch si mir da engegen zv einem rechten widerwæchssel gegeben zwen weingarten, die da ligent oberhalb Engelschalichstorf bey^a Liechtenstaine, der ainer haizzet der Schreiber vnde der ander der Plewêr, also daz ich vnd mein erben da mit suln auch ledichleichen vnd vreileichen allen vnsern frumen schaffen, verchauffen, versetzen vnd geben, swem wir wellen, an allen irsal. Vnd pin auch ich vnd mein erben vnuerschaidenleich dez vorgenanten weingarten ze Chremse der egenanten gæstleichen herren Abt Vlreichs vnd des conuents gemaine ze Raitenhaslach vnd aller ir nachchomen recht gewern vnd scherm fu^er alle ansprach, als perchrechtes vnd widerwæchssels recht ist vnd des landes recht ze O^esterreich. Wær aber, daz si mit recht an dem selben weingarten icht chrieges oder ansprach gewunnen, von swem daz wær, swaz si dez schaden nement, daz sol ich in alles auz richten vnd wider chern an alle ir mv^e vnd an allen irn schaden, vnd suln auch si daz haben auf mir vnd durch pezzer sicherhait auf den vorgenanten zwain weingarten ze Engelschalichstorf, die si mir ze einem widerwæchssel da engegen geben habent, vnd auf allem meinem gu^et, daz ich han in dem lande ze O^esterreich, ich sey lebentich oder tode. Vnd daz diser widerwæchssel fu^erbaz also stæt vnd||
vnzerbrochen beleihe, dar v^eber so gibe ich in disen brief ze einem warn sichtigen vrchunde vnd ze einer ewigen vestunnge diser sach versigelten mit meinem insigil vnd mit meins pergmaisters insigil dez vorgenanten Cholmans von Radendorf vnd mit dez erbern herren insigil hern Stephans von Meyssaw^e, obrister marschalich in O^esterreich, die diser sach gezeug sind mit irn insigiln. Diser brief ist geben ze Wienne nach Christes gebu^erde drevtzehen hundert jar dar nach in dem nevn vnd viertzgisten jar, dez mittichens in den phingst veyrtagen.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 742, S. 640-641