Nos Otto dei gratia Ecclesie Patauiensis Episcopus notum facimus vniuersis, quod, cum dilectus in christo frater Heinricus de Haidendorf Canonicus et Thesaurarius Ecclesie nostre, Archidyaconus Maticensis venerabili Preposito et conuentui de Ranshouen questionem moueret super iure Archidyaconali, quod se in dicto conuentv et capellis eiusdem habere asseruit, preposito et conuentv contrarium asserentibus et dicentibus ab huiusmodi iure penitus se exemptos, uocauimus partes ad nostram presentiam cupientes inuenire in premissis noticiam ueritatis, quibus in nostra presentia die prefixo constitutis et ab archidyacono predicto super iure archidyaconatus sui multis allegationibus hinc inde propositis predictus Prepositus de piano et sine strepitu iudicii exemptionis sue litteras non cancellatas, non uiciatas nec in aliqua parte sui abolitas, saluis sigillis nobis et fratribus Capituli nostri, qui presentes aderant, exhibuit, quarum etiam tenorem presentibus inseri fecimus per omnia in hec uerba: Innocentius Episcopus seruus seruorum dei Dilectis filiis Preposito et fratribus Ranshovensis Ecclesie salutem et apostolicam benedictionem. Justis petentium desideriis dignum est nos facilem prebere consensum et uota , que a rationis tramite non discordant, effectu prosequente conplere. Ea propter dilecti in domino filii uestris multis postulationibus grato concurrentes assensu felicis recordationis Celestini pape predecessoris nostri uestigiis inherentes presentium auctoritate statuimus, ut is, qui in Ranshovensi Ecclesia locum regiminis obtinet, curam plebis ad eandem Ecclesiam pertinentis exerceat, ut uidelicet nullus in tota illa parrochia preter Archiepiscopum et Dyocesanum Episcopum et eundem Prepositum aliquid debeat ordinare. Nulli ergo omnino hominum liceat hanc nostre paginam constitutionis infringere uel ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Laterani VI. Kalendas Junii, Pontificatus nostri anno quinto. — Item litteras domini Manegoldi Episcopi. In nomine — (Es folgt die Urkunde vom 11. Jänner 1212: OÖUB, 2. Band, S. 533, Nr. 374). Item litteras judicum sedis apostolice. In nomine domini. Ego Heinricus abbas de Prv^ol et ego Gervngus prepositus de Osterhoven et ego Rudpertus Ratisbonensis ecclesie Scolasticus ex delegatione sedis apostolice de causa , que uertitur inter Prepositum de Ranshoven ex vna parte et Chunradum Archidyaconum Pataviensem ex altera super archidyaconali iurisdictione in parrochia dicte prepositure exercenda uel non, cognoscentes, sicut potuimus, ueritatem perscrvtati sumus. Et quia dictus Archidyaconus peremptorie a nobis citatus nec uenit nec cause sue defensorem misit, priuilegium sedis apostolice, quo dictus prepositus ecclesiam suam munitam esse dicebat, legentes inuenimus in eo contineri, quod nullus in parrochia sepe dicte prepositure iurisditionem aliquam debeat exercere preter archiepiscopum et dyocesanum episcopum et eiusdem loci prepositum, vnde manifeste apparet, quod archidyaconus sit exclusus. Quam ob rem auctoritate, qua fungimur, sententiantes preposituram Ranshovensem et totam eius parrochiam ab impetitione dicti archidyaconi absoluimus et ab omni archidyaconali iurisditione iuxta intentionem et concessionem factam a Celestino papa eam cum Capellis in priuilegio denominatis exemptam esse iudicantes statuimus, ne uel ipse uel aliquis successorum suorum archidyaconorum contra tenorem illius priuilegii aliquam in territorio Ranshovensis prepositure et eius parrochia cum capellis in priuilegio denominatis archidyaconalem iurisditionem debeat exercere. Datum Ratisbone in maiori ecclesia sancti Petri anno incarnationis domini M. CC. XI. Idus Nouembris. — His igitur perlectis omnibus et discussis, quia Ecclesiarum iuribus derogare non intendimus ullo modo, vnacum predicto archidyacono de consilio et uoluntate Capituli nostri Conuentui predicto in Ranshoven et preposito recognouimus iuxta tenorem priuilegiorum omnia supra dicta et auctoritate nostra defectum, si quis in illis esset forsitan, supplemus taliter per presentes ita, ut ab omni iurisditione archidyaconi de cetero sint exempta. Et ne in posterum grauentur ab archidyacono quocunque, qui pro tempore fuerit, in premissis, presentes litteras in testimonium et confirmationem exemptionis predicte sigillo nostro et Capituli nostri mvnitas ipsis dedimus cum testibus subnotatis, qui sunt hii: Boppo Decanus Pataviensis, Magister Leo Decanus Ratisbonensis, Albero comes de Rotenekke, Heinricus de Heidendorf archidyaconus Maticensis, Magister Hertwicus, Otto Cantor Canonici, frater Heinricus de Merswanch domus Theothonice, Heinricus de Hartheim, Berhtoldus de Haidendorf, Pilgrimus et Waltherus de Tannberch et alii plures. — Actum Patauie Anno domini M. CC. LXI. IIII. Idus Junii, Pontificatus nostri Anno Octauo.

Source Fulltext: OÖUB 3 (Wien 1862) S. 278-280, Nr. 296