Nos Wichardus de Polnhaim senior dei gracia et Dietericus Judex Ciuitatis In Welsa omnibus notum facimus per presentes, quod pro contencione sopienda, quam Prepositus Ranshouensis habuit contra Chunradum de Aichperg super quodam predio dicto in Aichperg, quod est Ecclesie in Ranshouen, ita per nos et ceteros ciues in welsa est efficaciter et finaliter arbitratvm de consensv dicti Prepositi et Chunradi prenotali, quod ipse Chunradus de Aichperg debet dictum predium soluere ab obligatione hainrici mutarii in Linza, cui preter consensum Prepositi Ranshouensis et conuentus ibidem obligauit pro VIII. talentis, infra festum Pentecostes nunc venturi fieri debet ipsa solucio per Chunradum sepe dictum sine detrimento Ecclesie Ranshouensis, quam solucionem quocumque modo infra illud tempus neglexerit, statim ipsum predium in Aichperg libere et integraliter erit Ecclesie Ranshouensis, et Chunradus predictus et priuatus iure suo hereditario, quod habuit in predio pretaxato. similiter etiam ipse Chunradus in ipso predio iure suo est priuatus, si quando temerarie neglexerit dare seruicium de ipso predio et duas mansiones annis singulis Ecclesie uel Preposito Ranshouensi, non obstantibus aliquibus causis siue dampnis, que possunt in ipso predio malo fortuito prouenire. Anno domini M. CC. LXXVII. Acta sunt hec IIII. Idus Januarii. Et ne hec a quoquam valeant inmutari, hanc cartam sigillo nostro et sigillo ciuitatis fecimus roborare Preposito Ranshouensi pro testimonio et cautela. Huius rei testes sunt Richerus (de) edelspach, Wernhardus pauraiaer, Chunradus de alhalming, chunradus furtan, Geotfridus smerl, ortolfus Judex et alii quam plures fide digni.

Source Fulltext: OÖUB 3 (Wien 1862) S. 458-459, Nr. 496