Nos wernhardus dei gracia ecclesie patauiensis episcopus ad perpetuam rei memoriam scire uolumus uniuersos tam presentes quam posteros, quod uenerabilis frater noster dominus Chunradus prepositus ecclesie Ranshouensis in nostra constitutus presencia quedam statuta per eum et conuentum suum edita nobis in scriptis exhibuit petens nostre auctoritatis confirmari munimine, quorum tenorem presentibus inseri mandauimus in hec uerba: Nos Chunradus dei gracia prepositus et conuentus ecclesie Ranshouensis aduertentes, quod sancta et salubris est cogitacio pro defunctis exorare, quatenus a peccatorum oneribus eruantur. Decernimus ac irreuocabiliter constituimus, ut decedente fratre nostro presbitero uel dyacono uel alio sacerdote extraneo, quem deuocionis sue intuita fraternitatis nostre milicie duxerimus aggregandum, Ac corpore ipsius aput nos tradito ecclesiastice sepulture fratres ceteri sacerdotes pro humanitatis debito conpassibiliter exequendo die sepulture flagellum recipiant a preposito uel ab eo, qui capitulo presederit uite sue (sic) Et nichilominus pro sepulti remedio cum choro celebrabunt Triginta missas continue pro defunctis procurante easdem ebdomario ebdomade subsequentis. Sepulchrum quoque defuncti usque ad tricesimum obitus sui diem cum trina campanarum compulsacione duabus candelis ardentibus choro canente responsorium pro mortuis et placebo dicente inibi consumatis uesperis processionaliter uisitetur. Insuper quilibet confrater sacerdos infra anni spacium Triginta missas pro defunctis celebret inpriuate. (sic) Dyacones uero et subdyacones fratres nostri scolis emancipati ac sorores litterate uigilias, barbati quoque fratres et sorores nonlitterate Sexaginta pater noster et totidem Aue maria legant diebus singulis usque ad tricesimum fratris mortui prenotati. In decessu autem subdyaconi seu barbati confratrum nostrorum seu conuerse sororis nostre omnis premissa sollempnitas usque ad diem septimum peragatur illo dumtaxat adhibito moderamine, quod, si aure obstante intemperie sepulchrum comode, ut expressum est, non poterit uisitari, placebo legatur in choro uno sacerdote thurificante et duobus scolaribus adspergentibus totum cymiterium cum sopulchro. Quodsi hiis exequendis dies incidant, in quibus pro defunctis non expedit celebrari, in diebus suppleatur sequentibus, quod taliter est obmissum, ad hec ut de decimarum nostrarum decimis iuxta institucionem fundacionis nostre laudabilem quidem sed abolitam quodamodo eum in suis foueamus minimis, qui decimas sibi in signum generalis dominii reseruauit, Statuimus, ut uniuerse decime ad hospitale nostrum ab antiquo pertinentes annis singulis sequestrentur et in usum mendicancium penitus inpendantur ita, ut quod omni die cantata prima omnibus consolacionis beneficia petituris, vndecunque uenerint, per nostrum clauigerum elemosinarum participacio consolacionis nos diuino munere cum nostrarum auctoribus decimarum ac aliis benefactoribus nostris superstitibus et defunctis capescamus (sic) pro terrenis celestia et pro temporalibus sempiterna. Cui statuto nullius necessitatis uolumus instanciam derogare. Nos igitur attendentes, quod premissa statuta racionis suffulciuntur tramite et ab equitatis limite non discordant, ipsa de certa sciencia in dei nomine cofirmamus Mandantes sub uirtute sancte obediencie et obtestacione diuini iudicii districtius inhibentes, ne quisquam prepositus aut alius de collegio Ranshouensis ecclesie ullo unquam tempore contrarium audeat adtemptare. Datum anno domini millesimo CC°. Nonagesimo vdalrici confessoris patauie in curia nostra.

Source Fulltext: OÖUB 4 (Wien 1867) S. 134-136, Nr. 142