Wir Heinrich der Elter vnd Heinrich der Junger vnd wernhart von Schovnwerch Tůn chunt allen den, di disen prief lesent vnd sehent, daz wir dem Gotshaus vnd der samung ze Ranshouen ze vodrist vns vnd vnsern vorfodern vnd auch vnser nachchumft ze einem heil vnd ze einem selgret vnd auch durch des Gothauses dinst vnd sein gůt, domit ez probst Chunrat an vns erworben hat, ham gegeben ein so^etan frivng, daz si ebichleichn alle iar fu^enfzehen gantziv fuder weins an Movt fu^erfu^eren an vnser Movtstat ze Ashach freilichen, nuwan daz man von dem podm dez Shevffes geben sol virzehen pfenning vnd zween pfenning ze letz vnd swaz si dez vorgenanten weins in dem herwest niht gefu^eren mu^egen, daz suln si fu^eren fu^er an derselben Mautstat, swann si wellent in dem selben iar, mit ganzer frivng alsam in dem herwest. Darv^eber geben wir dem Gotshaus vnd der samung ze Ranshouen ein sogtan genad vnd ein sogtan frivng, Swenn si ir Chost fu^erent hintz Osterich oder swann si ein flos, dez si bedu^erffen ze zimberholtz auf ir hof hintz Chrems, dev su^eln auch ledichleichn fu^ergan alsam der wein, niwan daz man von dem ruder des flosses geben sol vier pfenning. Daz aber div gab vnd div frivng pi vns vnd pi vnser nahchumft stat vnd vnzebrochen beleib der sammung ze Ranshouen, darvber geben wir den brief mit vnsern insigeln bewart zeinen vrchu^end vnd ze einer gewarheit vnd der sach sint zivg di hie geshribn erbaer levt: Her Chunrat Stol, her Rudolf Shifer, her Dietrich Schifer, Rudolf stal, Helmhart von stille, Heinrich Harder von Provnow, Dietmar shreiber, To^enhart von Julbach. Dise frivng ist gegeben von Christes gebu^ert Tausent Jar, zwaihundert iar, in dem ain vnd Nivnzgisten iar an vnser frowentag, do si geboren wart vnd geshach ze Julbach of dem Haus.

Source Fulltext: OÖUB 4 (Wien 1867) S. 157-158, Nr. 170