Wir jannse vnd Hainreich vetern von Ror tun zewissen allen den, di disen prief anschehent, daz vier di hueb in Rosspach, di ainweich der zolner vom im hete zem rechtem lechen, div vnsers freies aigen was, hawen gegewen freileichen dem gotzhaus ze Ranshouen vns unt unsern uoruodern ze einem selgraet vnt glowen dem probst unt der sammung ze Ranshouen, daz wier in daz selbe guet schermen suln mit gwershaft vor recht, als recht ist, vnt gewen dar uber disen prief uersigelt mit vnsern insigeln. Daez sint zeug her wernher der probst uon oting, Her hainreich der pfarrer uon purchusen, her werntzel der mauter, meingoz uon vwreken, Fri. sein sun, Albrecht der chelner, vlreich der cholb, Hainreich zolner, ainweich zolner vnt ander piderb leut. Diser prief ist gegewen ze purchusen, do uon Christs purd worn vergangen Tausent iar, zwai hundert iar, dreu vnt nevnzig iar an sant Niklos tag.

Source Fulltext: OÖUB 4 (Wien 1867) S. 195-196, Nr. 213