Ich Hainrich von Ror tun chvnd allen den, di disen prief ansehend, daz Hainrich von Tarstorf mein aigenchleich hu^eb dacz Velwen in Tarstorfer pharre von mir svnderlichen zu lehen het, di selben hub het ouch ze lehen von im andre des goteshauses aigen man ze Ranshoven vnd gab derselb andre Hainreichen von Tarstorf zwelif phvnt Saltzburger, daz er mir an derselben hu^eb sein lehenschaft aufgaeb ledichleichen, vnd gab mir Andre sein lehenschaft auch auf durich des goteshauses willen ze Ranshouen vnd stunden bed ledichlich vnd vreilich von derselben hub, di Hainrich von mir het vnd Andre von Hainrichen also, daz ich di selben hůb, di vreilich mein svnder aigen waz, di selben aigenschaft gaeb hintze Ranshouen, da gab ich sei satzehand vreilich vnd ledichlich, versucht vnd vnuersucht, ze hultze vnd ze velde di selben hu^eb ze Velwen an allev ansprach vnd an alle widerred sand Pangrecin vnd seltz (sic) auf sein altare mit gutem willen meiner hovsvrowen vnd auch meines swechers hern Ortliebes von Walde vnd gabs dem probst vnd conuente ze Ranshouen, di got da dinent, ewichlichen zv einem vrein selgeraet mir vnd meinem vater vnd meinem bruder Otten vnd aller meiner afterchvnfte, daz man da von vnser iarzeit dester vleischlicher begen sol alle iar vnd auch han gelobt der selben hub datz Velwen gwer sein des goteshauses ze Ranshouen, als recht ist, fv^er allev ansprach, wan ich mich verzigen han meiner aigenschaft an der selben hub datz Velwen fvr mich vnd fv^er mein Hausvrowen vro Margareten vnd fv^er alle mein geriwen, ob ich di gewinne, daz daz vor genant mein selgeraet dem goteshouse ze Ranshouen beleibe an allen chrieg in nutzze vnd in gever vnd auch beleib vnd vnzerbrochen, (sic) han ich gegeben der somnvng vnd dem goteshuse ze Ranshouen dar vber disen brief ze einer sicherhait vnd zv einem vrchvnde disen brief (sic) versigelt mit dem insigel meines herren hern Hainrich von Schovnwerch vnd mit meinem insigel vnd sind des zeuch Marquard der schvlmaister des Grans chind, Her Meingoz von vbroechen, Hainrich von tarstorf, Hartman der Stal, Hainrich der svltzperger, Hainrich der Hu^eber, Hainrich der probst des Rorer, Ortel des chamerer svn, Ludwich der hofmaister, Wernhardus cholwel, Hainrich von vbrechen, Otto von hůb vnd ander ewerig laevt vnd ist daz geschehen, do von christes geburte warn ergangen tausend iar vnd zwai hvndert iar, in dem fvnf vnd nevzigestem iar an sand Agnes tag ze Ranshouen auf dem chore.

Source Fulltext: OÖUB 4 (Wien 1867) S. 221-222, Nr. 243