In nomine domini Amen. Nos Wernhardus dei gratia Ecclesie Pataviensis Episcopus ad perpetuam rei memoriam per presentes scire uolumus presentes pariter et futuros, quod dilectus in Christo frater dominus Chunradus venerabilis Ranshouensis Ecclesie prepositus benigno Conuentus sui accedente consensu zelo deuocionis accensus ordinacionem in Ecclesia sua statuit infra scriptam perpetuis temporibus inuiolabiliter obseruandam. Chunradus dei gratia prepositus Et Conuentus Ecclesie Ranshouensis vniversis presencia inspecturis perpetuam rei memoriam. Loca sanctorum omnium pia et prompta deuocione sunt a christi fidelibus veneranda, vt dum dei veneramur amicos ipsi nos amabiles deo reddant et quod aput ipsum merita nostra non optinent, eorum mereamur intercessionibus optinere. Cum itaque Capella beate dei genitricis perpetue uirginis Marie nostro annexa monasterio sit digno fauoris munere prosequenda, quia nulli dubium esse debet, quin totum ad laudem christi pertineat, quicquit genetrici sue digne laudis impensum fuerit uel honoris, singulis tam presentibus quam futuris scripti huius testimonio fieri uolumus manifestum, quod fideliter intendentes tam profectui nostre Ecclesie quam instauracioni perpetui luminis habendi in Capella prenominata Curiam quandam cum Huba sibi annexa sitam in Horheiminge in Parrochia valchenperig emimus a discreto uiro sybotone de Ettenuelden pro decem et Nouem Talentis et sexaginta denariis Ratisponensis Monete, in cuius debiti solucione recepimus a dilecto in Christo fratre nostro Dietmaro sacerdote Octo talenta Ratisponensia, que idem de munere piorum hominum zelum ad perpetuum lumen pro predicta Capella habentium congesserat et fideliter conportarat, hubamque predictam vnanimi consensu paribus votis et vocibus ad hec deputauimus, dedimus, vt per ipsius prouentus, fructus et seruicia principalia et accessoria maiora et minuta lumen perpetuum in lampade procuretur. Et quia predictus Ditmarus concanonicus et confrater ad eiusdem luminis institutionem, prout effectus docuit, ardenti desiderio intendit non minus prouide quam promotiue, Nos eiusdem luminis curam et custodiam eidem conmittimus de premissis redditibus ad vite sue custodiam procurandam eoque mortuo eiusdem luminis procuratio ad custodem Ecclesie cum annexis redditibus conuertentur ita, quod in omnem casum et euentum fructus et redditus prefate hube ex nulla causa vel necessitate in vsus alios quam in lumen lampadis perpetue pro Capella beate virginis redigantur. Ad hec deputamus, donamus sexaginta denariorum redditus simplices de illa libra denariorum, que nobis preposito de Censu in die sancti Pancratii dari consueuit, vt per eosdem per ministerium custodis, qui pro tempore fuerit, lumen candele in Laterna portande ante sacrosanctam Evcharistiam, quando in villa vel locis vicinis portari contigerit, procuretur precipientes premissa omnia sub pena exconmunicationis ab omnibus perpetuis temporibus inuiolabiliter obseruari. In quorum testimoriium ad petitionem venerabilis fratris domini Chunradi prepositi Ranshouensis presentes dedimus litteras nostro sigillo munitas. Dat. Patanie Anno domini M°. Trecentesimo Stephani prothomartiris jn jnuentione.

Source Fulltext: OÖUB 4 (Wien 1867) S. 348-349, Nr. 374