Ich Chunrat von Hinterperig Jacob von Ha^enngebel Friedreich von Stochwis zechlewt ze den zeiten ze Ha^enttenperig, ich Chunrat von Ho^ehenperig und gemainchleich all pfarrlawt ze Ha^enttenperig verjehen, daz uns der erwirdig her probst Hainrich von Ranshoven mit dez conventz willen und rat geewigt und bestaet hat ain wochenmo^ess in unser pfarr ze Ha^enttenperig die wir daselben gewidemt und gestift haben also, daz dew mess gesprochen oder gesungen werden scholl all wochen ewichleichen an dem montag Gott und unser fra^ewn ze lob und allen gelawbigen selen ze trost und ze hilf, darumb wir egenant pfarrlawt dem pfarrer und seinem gesellen allew jar jarleichen geben schullen zwelif schilling O^ettinger pfenning oder was dafur gepurt. Der schullen wir in richten vier stund in dem jar ye zu der chottemer drey schilling auz dem zechschreyn an allen schaden. Ez ist auch getaydingt, ob wir vorgenant pfarrlawt dem pfarrer daz gelt ze yeder zeit alz vorverschriben stet nicht ga^eben, so schullen all tag darauf gen zwelif pfenning alz lang uncz daz er der gult mit sampt dem gelt daz darauf gegangen war gar und gancz gewert und verricht wurd. Ez ist auch ze merchen, ob dew egenant messe an dem montag nicht volpracht wurd von wietan sachen daz war, so schol si dez na^echsten tags darnach mit ainer andern mess ervolt werden an alz verziehen, und ob dez aber nicht gescha^eh so schol si an dem dritten tag mit zwayn messen ervolt werden ausgenommen ob sand Pangra^eczentag sand Augusteyntag sand Michelstag cha^em an den montag oder an den eritag, so mag der pfarrer die selben messe ervellen an dem mitichen mit einer messe. Ob aber ander veyrtag cha^emen an dem montag damit hat der pfarrer gewert. Wa^er aber ob der vorgenant punckk paydenthalben ayns oder mer nicht volpracht wurd alz oben verschriben ist, daz mugen und schullen wir geyn in si gein uns beruffen alz vil uncz daz der vorgenant goczdienst ga^enczleich volpracht wirt. Daz in und uns daz paydenthalben ewichleichen sta^et und unczebrochen beleib geben wir in zu^e urchund den prief versigelt mit dez erbern manns Hainrich von Raitenpuch ze den zeiten richter ze Weylhart anhangunden insigel. Darunder wir uns verpinden mit unsern trewn an geva^er sta^et ze haben und ze volfu^eren alz daz daz an dem prief verschriben stet. Datum anno domini M°ccc° (millesimo trecentesimo) septuagesimo in die Scolastice virginis.

Source Fulltext: OÖUB 8 (Wien 1883) S. 457f., Nr. 461