Ich Fridreich Sweikkers sun von Pischolfstorf vergich, daz ich han bestanden von dem erbern herrn hern Dietmarn probst ze Reichersperg ze pawmansrecht den obern hof ze Revel der dez vor genanten gotzhaus ledigs freys aygen ist, also daz ich in selben häusleich und stittleich besitzen sol und schul im auch und dem gotzhaus den verdienen und verstewrn alz ich stat und genad an in vinden mag. Geschäch aber daz si mir den vorgenanten hof nicht lenger mochten oder wolten lassen so schul ich in antwurtten stiftleich und päwleich und sam und ardhew richten alz landes recht ist, und wem si den hof darnach lassent den schol ich darzü fürdern und nynndert hindern. Und zu urchund gib ich in den prief versigelten mit meins lieben genädigen herren hern Jörgens von Ahaim und Heinreichs dez Talhaimer anhangunden insigeln. Geben nach Christes gepürd dreutzehen hundert jar darnach in dem zway und sibentzkisten jar an sand Matheus tag dez heiligen zwelfpoten und evangelist.

Source Fulltext: OÖUB 8 (Wien 1883) S. 608, Nr. 607