Wir Stephan der elter wir Stephan und Johanns geprüder, desselben herrn Stephan des eltern sune alle von Gotes genaden pfallentzgraven bey Rein und hertzogen in Beyern etc. bechennen offenlich mit dem brief, umb den grotzen schaden und gebrechen den der erwirdig geistlich man der brobst von Ranshofen das kloster und das convent gemainlich daselben manig zeit bisher von krieg unfrides schawer pyses und übriger gastung wegen genomen habent und noch täglich nement, haben wir demselben prost (sic) dem gotzhaws und dem convent gemainlich zu Ranshoven die besundern genade getan und tun auch mit chraft ditz briefs also, daz wir si gefreyet haben von aller gastung und ueberladung wie die genant mag sein, biz auf die pfingsten di nu schirist choment und darnach über drew ganzer jare mit der beschaiden, daz si in derselben zeit niemant wie der genant oder gehaizzen mag sein, er sey edler oder unedler höher oder nidern mit chainerlay gastung noch ueberladung nicht beswären noch überladen sol in chain weis, ausgenomen wenn wir mit unzer selbers leiben dahin chömen. Und darumb gebieten wir Gorigen dem Aheimer unserm viztum in Nydernbayern und allen unsern amptläwten wie di genant sind di wir jezu haben oder fürbaz gewinnen und sunderlich unserm pfleger und richter zu Weilhart ernstlich bey unsern genaden und hulden, ob si jemant wie der genant wär an den vorgenanten unsern genaden mit chainen sachen laydigen oder beswären wolte, daz ir si dann von unsern wegen trewlich davor beschirmet und behaltet und des nicht gestattet in chain weis als lieb ew unser genad und hulde sein, wann wir nicht lenger gestatten wellen das unser klöster als pärlich verderben und wan wir auch die genad und freyung allen unsern klöstern in Nydernbeyrn getan und gegeben haben. Mit urchund des briefs den wir obgenant drey herrn in geben mit unsern anhangenden insigeln versigelten, der geben ist zu Burchausen am freytag vor sand Görigentag anno domini MCCCLXXIII.

Source Fulltext: OÖUB 8 (Wien 1883) S. 643, Nr. 643