01 Ich Wilhelm Meienschein, Schüldtheisz zü Ellstatt, Vnd Wir, diese hernachbenante mitt||
02 Namen Hannsz Knausz, Stoffel Meisz, Jost Weinheimer, Burckhardt Büttel, Simon Bardt vnd Hannsz Weber, Alle geschworne||
03 gericht schöffen daselbsten, Bekhennen vns Offentlichen mit disem Brieff, Dasz vor Vns inn sitzendem gericht Persönlichen||
04 komen Vnd erscheinen ist Der Erbar Wolff Beckher, Burger alhie zu Ellstatt, Ehelisabeth, sein eheliche Hauszfrauw, die||
05 Verjachen Vnnd bekanten Offentlich, dasz sie Vor sich, ir erben vnd nachkomen Vffrecht Vnd Redlichen Verkhaufft vnd zukauffen||
06 geben Haben Den ErenHafften, Ersamen Vnd Erbaren Kirchen geschwornen zu Ellstatt sampt derselbig[en] nachkomend[en]||
07 oder dem, so disen brieff mit irem gutten wissen Vnd willen innen Hatt, Ein jerliche guldt mit Namen Vier gulden geldtsgülten||
08 Vnd die Eines jeden jars Vff Martini, desz Heiligen Bischoffstag, reichen, weren, liffern Vnd zuantworten, dasz nit Hindern soll||
09 kein ding oder Vngeuel, so jemandt Hierwider erdenckhen oder gesprechen köndt oder* möcht in kein weisz oder weg, sonder alle||
10 geuerdt. Vnd ist dieser kauff hieruber zugangen Vnd beschehen Vor vnd Vmb Achtzig gulden gutter vnd genemer dißer landts||
11 werung, Welche Suma der Achtzig gulden gerüerter werung benante eheleütt Verkeüffere Von inen den Keüffern Also bar||
12 endtpfangen, fürter in iren bessern nutzen Vnd fromen gekhert Vnd gewendt Haben, alsz sie sich dasz Vor vns Offentlichen Verjach[en]||
13 Vnd bekhanten; Vnd vff dasz gedachte keüffere oder ire nachkomene bemelter Vier gulden geldtsgulten Vff bestümpten termin||
14 eines jeden jars desto sicherer Vnd gewisser endtpfahen mög, So haben sie eheleüt Verkeüffere inen den keüffern zu einem||
15 rechten wahren Vnd Vnuerscheiden Vnderpfandt darfür eingesetzt Vnd verlegt Nemblichen ein Halben morgen wingardt im||
16 Somer Pfadt Oben zu Seebachgut Vnden zu Adam Vngeuer zu Fußgenheim, ist eigen; Mer ein Zweitel wingardt in d[er] geinsmüden||
17 oben zu Jost Metzlers witib, Vnden zu Caspar Vogel zu Fußgenheim, ist zum Halben theil widem** Vnd zinst das Ander Halbtheill||
18 ein Vierntzel*** korn In die friemesz, sonst eigen; Mer anderhalb morgen Ackhers in der kirchgewannen oben zu Matis Dantzwol||
19 Schuldtheisz zu Retersheim****, Vnden zu Heinrich Grossen erbenn, ist eigen; item anderhalb Viertel Ackhers in der mittelge-||
20 wannen, oben zu Thoman Würdts witwe zu Gennheim, Vnden zu Jost Höns, Schuldtheisz zu Fridelsheim, ist eigen. Dergestaldtt||
21 wo sie eheleut verkeüffere ire erben Vnd nachkomen An auszrichtung der Vier gulden geldtsgülten seümig sein wurden, vff zil||
22 vnd zeit inmassen Vorsteth jerlichen nit***** endtrichten oder bezalten, dasz doch nit sein soll, So Haben Vilgedachte keüffere oder||
23 ire nachkomene gut fug Vnnd macht jetz geschribene Vnderpfend[er] vffzuholen Vnd zu gewinnen nach desz gerichts zu Ellstatt||
24 recht vnd gewonheit; Auch Haben wür Schuldtheisz Vnnd gericht schöffen obgemeldt jetz geschribene Vnderpfender Vor vns genomen||
25 die geschetzt vnnd Hieruber zurecht erkhandt, Dasz diese Vier gulden geldtsgulten zu diszer zeit sicher vnd wol Verlegt seyen; Auch||
26 Ist berett, wann sie eheleüt Verkeüffere oder ire erben wellen jedes jars Vierzehentag Vor oder nach Martini mögen sie mit||
27 Achtzig gulden Vorberüerter werung, wie sie die endtpfangen, bemelte Vier gulden geldtsgulten ablösen Vnd widerkauffenn||
28 sich ir vnderpfender Vnnd diszen brieff damit quit, ledig Vnd losz machen, doch dasz alle vnd jede Verfallene Vnd Versessene gülten Auch||
29 costen vnd schaden, ob einich[er] daruff gangen Vnnd erlitten were, gentzlichen zuuor endtricht Vnd bezalt seyen, Geuerdt vnd Argelist||
30 hierinnen gentzlichen Vermitten Vnd Auszgescheiden; Vnd desz zu wahrem Vrkhundt Haben wür Schuldtheisz Vnd Schöffen obgemeldt vnser||
31 desz gerichts eigen insigel Hier an disen brieff gehenckht Alles was vorgeschriben damit krefftiglich zu besagen. So geben vnd geschehen||
32 Dinstags nach der Osterwochen den zweiten tag Aprilis Als man zaldt nach d[er] geburt Jesu Christi vnsers einigen erlösers vnd Seligmach[er]s||
33 Einthausendt Sechshundert vnd Eilff jar.

Source Fulltext: Andreas Kuhn, M. A., und Dr. Gabriele Stüber, Neustadt/Weinstraße, ehrenamtliche Tätigkeit.