Abschrift||
01 Ich Hans Schieffer ein burger zu Wachenheim Erkennen offentlichen In diesem brieffe vnd thun kunt allen den die yne vmmer||
02 ansehent lesen oder horent lesen, Das ich recht vnd redlich verkäuft vnd zu kauff geben han vff eyn widderkauff vnd||
03 verkeuffen auch mit crafft dißs brieffs Sant Walpürga pfrunden zu osthoffen oder eym besitzer derselben pfrunden ein Jarlich gult||
04 Nemlich ein ort eins gulden vmb funff rinscher gulden, der ich vor dato dißs brieffs von pfarrer vnd kirchengesworn zu wachen-||
05 heim wole gewert vnd bezalt bin vnd die In myn notz vnd andern myn schaden damit zuuerkomen gewant habe. Das obge-||
06 schrieben ort eins gulden gelts geredden vnd versprechen ich Hans vorgnant vor mich vnd myn erben der vorgnanten||
07 pfrunden eym besitzer der pfrund[en] oder Inhelter diß brieffs alle Jar Jerlich zu reichen vnd zu geben In iren sichern gewalt off||
08 sant martins tag des heiligen Bischoffs ongeuerde Das soll nit hindern verbietten bekom[m]ern mit geriecht oder on geriecht||
09 geistlich oder weltlich herren gewalt oder dheyne andersach wie die yeman erdencken kunt oder mocht on alle geuerde. Vnd des||
10 zü merer sicherheit, So han ich Hans obgnant vor mich vnd meyn erben der vorgnanten pfrunden eym besitzer der pfrunden||
11 oder Inhelter diß brieffs zu eym waren vnderpfande gelacht vnd legen auch In crafft dißs brieffs diese hernach geschriebenn||
12 gutter, Nemlich eyn morgen wingarts In konigs wingarten* gnant der felcker, geforcht Heinrich Obszer schultheis oben zu, vnden||
13 zü Gerüngs witwe, zinßt ein halb ame wins Arnolt von Buhels seligen erben Vnd soll forter nitme zinsen noch witer verlacht||
14 oder verpfent sin mit solichem vnderscheide; weressach das ich Hans obgnant oder myn erben vnd Nachkomen etlichs Jars sümig||
15 werden vnd das obgeschrieben ort eins gulden nit rechten vnd geben vff sant Martins tag als vorgeschrieben stet, Das doch||
16 nit sin soll, welchs Jars das geschee, So soll vnd mag ein besitzer der obgnanten pfrunden vff solich vnderpfand wetthen||
17 vnd das vff holen nach geriechts recht vnd gewonheit der stat wachenheim vnd weres, das das vnderpfande mit ge-||
18 riecht vff geholt vnd erwonden worde als vorgeschrieben stet, Welchs Jars das abermals geschee, So soll ein iglicher schult-||
19 heis, der dan zü zyten ist den besitzer der vorgnanten Sant walpurgen pfrunden In das obgnant vnderpfant schuwern** vnd||
20 schirmen als In andern der pfrunden eygen guter. Auch soll ich Hans vorgnant oder myn erben das vor gnant vnder-||
21 pfant In rechtem Redlichem buwe vnd dhüng Ime dan zu gehort halten vnd weres, das sich erfund, das das vnderpfant||
22 yeman ine zinst, versatzt oder nit In buwe vnd dhungung gehalten wirden als vor geschrieben stet, was costens oder||
23 schadens der vorgnant besitzer der pfrunden des lidde oder neme, Den soll ich oder myn erben Ine naher thün vnd widder||
24 keren mit dem heupt gelt vnd herwidder soll ich Hans vorgnant oder myn erben vns nit behelffen mit dheyne||
25 funden oder sachen, Die dem vorgnanten besitzer der obgemelten pfründen oder dem der diesen brieff Inhat In eynichen||
26 weg geschaden vnd vns gekom[m]en mocht on alle geuerde vnd argelist. Auch ist beret welchs Jars Ich Hans obgnant||
27 oder myn erben und Nachkomen komen vierzehen dage vor sant Jorgen tag des heiligen Rietters vnd bringen sament-||
28 hafft funff gulden an golt, Die dan zu ziten genge vnd geneme*** sint vnd begeren eins widderkauffs, Doch also das alle||
29 gefallen gult costen vnd schaden vorhin geracht vnd das vnderpfant icht**** vff geholt ßy mit gericht als vorgeschrieben||
30 stet, So sollen pfarrer vnd kirchengesworn oder Inhelter dis briefs die von vns nem[m]en vnd diesen brieff on widderredde widder||
31 redde widder geben, Der als dan crafftloß onmechtig vnd dot sin soll. Des zu warem vrkund vnd merer sicherheit, So han||
32 ich Hans vorgnant gebetten Die erbern vnd wisen Burgermei[n]ster vnd rat zu wachenheim, dassie das vor geschrieben vnder-||
33 pfant vor sich nem[m]en vnd Erkennen, ob das obgemelt ort eins gulden wole verlacht sy vnd ire Ingesiegel wollen hencken||
34 an diesen brieff mich myn erben vnd nachkomen zubesagen aller obgeschrieben dinge, Des wir die Burgermeister vnd||
35 rat atzgnant vns Bekennen, das wir gewißt vnd erkant haben, das das obgemelt ort eins gulden zu dieser zit||
36 wole verlacht ist vnd vnser Ingesiegel vmb flißiger bet willen des obgnanten Hansen haben thun hencken||
37 an diesen brieff Ine sin erben vnd nachkomen zu besagen aller obgeschrieben dinge, Der geben ist vff Dinstag Nach dem||
38 Montag als man zalt nach C[h]rist geburt fünff zehenhundert ein Jar.

Source Fulltext: Doris und Dieter Pucher, Wachenheim, ehrenamtliche Tätigkeit. Geprüft im Zentralarchiv