Abschrift||
01 Jch, Friederich Deudt, d[er] zeyt Schultheis, vnd wir, die scheffenn gemeinglich des gerichts zu durckheim, Bekennen offentlich mit diesem Brieff vnd thun künth||
02 allermeniglich, das für vns in gerichts weyß ist khom[m]en Hans Schmidt Vnd Katharin, sein eheliche haußfrau, vnd hant erkant, das sie verkaufft hant Vnd verkauff[en]||
03 auch in crafft dißs Brieffs vor sich vnd ire erben Sand Johann pfarkirchenn ein gulden vnd ein ortt eins guld[en] ierlicher gulten eins Jglichen Jars Vff Sand Martins, des||
04 heligen Bischoffs dag, Jm furwintter gelegen, Vmb Zweinczig funff gulden, Jed[en] g[ulden] zu xxvi alb[us] gerechnet*, die sie von den geschwornen der selben kirchen gewert Vnd||
05 beZalt werent, die auch in iren nucz Vnd from[m]en gekert Vnd gewant habent. Vnd lachtent den genant[en] kirchenmeistern Von d[er] kirchen Wegen dißs hernach Jre gutt Zu||
06 eim vnuerscheidelich[en] vnderpfand, Mit Namen: ein Morgen Wingart, geleg[en] in d[er] faust gaßsen, geforcht noher walt Gansers Paul, vnden noher Rhein d[er] almend||
07 wege, ist leddig eigenn [et cetera]. Solichen Wingart gaben sie dem kirchenmeister von d[er] kirchen Wegen in Vnd[er]pfants Weyse uff mit hant Vnd halme, also beschaidelich:||
08 Welches Jars Hans Schmidt Vnd Katharin od[er] ire erben seumig werden Vnd dem kirchenmeinster d[er] obgenant[en] Vnser kirchen Den obgeschrieben guld[en] vnd ein ort eins guld[en]||
09 nit geben vnd bezelten mit gelt, als hie zu Durckheim gange Vnd geneme were, Zu dem bestimpten ziel Sant Martins tag, so moechte d[er] selbe kirchenmeister, d[er] als dan||
10 were, das benant Vnderpfand darfur vffholen Vnd an die genant[en] Vnser kirchen Bringen noch dißs gerichts recht, lauff vnd gewonheyt [et cetera]. Die obgenant[en] Verkeüffer,||
11 Hans vnd Katharin, gelopten auch mit treüwen Vndgeschwornen mit Vffgeregten fingern eynen eydt zu got Vnd den heligen, daßs sie nit anderst Wisten, das dißs Vorgeschrieb[en]||
12 gutt nit Mehr od[er] anderst zinßbar, Wan Wie obstet, auch vorhin niemant anderst Versaczt od[er] verpfand were. Hier uff erkanten Wir, die obgenan[n]t[en] scheffenn,||
13 Vnd sprachen zu recht, das die zweinczig funff gulden hauptgelts Vnd d[er] gulden vnd ein ortt eins guldin ierlicher gültt[en] mit dem gutt Wole vnd sicher damit||
14 verlacht sey vnd dieser kaüff mit aller seiner Verbintnüßs mechtig sey vnnd krefftig [et cetera]. Hans Schmidt Vnd Katharin hant sich auch versprochen Vor sich Vnd ire erb[e]n,||
15 dißs vnderpfand alczyt in gütem, gewonlichem bauw zuhalten. Doch ist den genanten ehelut[en] vnd erben hier Jn diese freuntschofft zügesagt: Welichs Jars sie oder||
16 ire erben khomend vor Sant Georgen, deßs heligen mertlerßs, tag Vnd Bringent Zweinczig fünff gulden samethafft obgerurter Wehrüng Vnd begerent, domit die obgeschriben||
17 gult Wider abe zükaüffenn, die sollent die kirchen geschwornen d[er] vorgenan[n]t[en] pfarkirchen zu Dürckheim Von den egenant[en] ehelut[en] od[er] iren erben nemen, Jnen od[er] iren||
18 erben den Widerkauff gonnen Vnd dan diesen Brieff crafftloys wider geben Vnd Jre Vnderpfand leddig zelen. Vnd sol dan forther die gultt abe sin, es wer dan,||
19 das deßs vorgenant Vnderpfand außsstender gult[en] halb furhin üffgeholt were od[er] in clagen lege, Wan als dan solt d[er] widerkauff keynen Vorgang han, die aüßsstende gültt||
20 Vnd cost[en] vnd schaden, der daruff wer gangen, Weren dan furhin aüsgeracht Vnd beZallt. Alle Vorgeschriebene ding Vnd Jglichs besonnder Versprach[en] die Vorgenan[n]t[en]||
21eheluth vor sich vnd alle ire erben stet Vnd veste Zu haltenn, Darwidder nit zuthün noch schaffenn, gethon Werd, in keynerley weyßs, die Jemant erdencken khan,||
22 on alle geüerde. Das alles Zu warem Vrkünde han Wir, Schültheis Vnd Scheffenn, Vnser eigen gerichts ingesiegel vmb fleissiger bitt Willen d[er] vorg[e]nan[n]t[en]||
23 ehelude, verkeüffer, Vnden an diesen brieff thun Henncken, Alles, Wie obstet, domit zu besagenn. Der geben ist Vff heud, Montag noch||
24 Valentinj, Jm iar nach der geburt Christi, vnnsers seligmachers, Daüset funffhundertt sechczigk iar.

Source Fulltext: Dr. Bernfried von Löbbecke, Bad Dürkheim, ehrenamtliche Tätigkeit. Geprüft, überarbeitet und kommentiert von Andreas Kuhn M. A., Neustadt/Weinstraße