Omnibus Christi fidelibus Hawysa priorissa et conuentus monialium sancte Marie de Clerekenewell salutem in domino Nouerit uniuersitas uestra quod cum inter uenerabiles uiros dominum G decanum et capitulum sancti Pauli Lond ex parte una et nos ex altera parte super quibusdam decimis et iure parochiali prouenientibus de terra et domibus Walteri de Hebrug item de quadam terra que appellatur La Lee et de aliis quibusdam particularibus areis quas dominus Iohannes de Neuill tenet de capitulo sancti Pauli faciendo seruitium curie de Hebrug item super decimis prouenientibus de quadam crofta que iacet prope curiam nostram apud Thotam et est de tenemento de Hebrug questio uerteretur et super omnibus premissis inter ipsos decanum et capitulum et nos per uiros fide dignos et per testes utrimque iuratos de parcium consensu diligens inquisitio facta fuisset nos attendentes ex inquisitione premissa omnes decimas predictorum prediorum cum pertinentiis et totum ius parochiale inde proueniens ad ecclesiam suam de Hebrug de iure spectare attendentes etiam eosdem omnia premissa tam iure parochiali quam iure dominii antiquitus possedisse easdem decimas et ius parochiale ecclesie beati Pauli restituimus sine strepitu iudiciali pacifice et perpetue possidendas In cuius rei testimonio presens scriptum dedimus eisdem sigillo nostro munitum Actum in capitulo nostro Lond anno gratie m cc xxxvii in octabas epiphanie domini

Source Fulltext: Early Charters of the Cathedral Church of St. Paul, London. Marion Gibbs. Camden Third Series, V.58. Offices of the Royal Historical Society. London. 1939.