Omnibus sancte matris ecclesie filiis presens scriptum inspecturis Eustachius diuina permissione Lond[] ecclesie minister humilis salutem eternam in domino Cum mota est controuersia inter priorem et canonicos sancti Bartholomei Lond[] ex una parte et magistrum et fratres hospitalis sancti Bartholomei ex altera coram venerabili fratre Benedicto Roffensi episcopo et coniudicibus suis a summo pontifice delegatis super magistro eisdem fratribus preficiendo super fratribus recipiendis et aliis articulis quam plurimis tandem post multas altercationes utraque pars spontanea voluntate super omnibus articulis et questionibus motis et non motis tempore confectionis istius scripture mutuo adinuicem competentibus se nostre subiecit remota appellatione ordinacioni Nos igitur habito virorum discretorum et iuris peritorum consilio utriusque partis utilitati paci prouidere cupientes et tranquillitati ita duximus ordinandum videlicet quod cum creandus fuerit magister in hospitali sancti Bartholomei[] fratres eiusdem hospitalis ad priorem sancti Bartholomei [...] accedant et petita ab ipso eligendi licentia personam sibi in magistrum eligant ydoneam sacerdotem videlicet vel talem qui ad ordinem sacerdocii in breui possit promoueri Quo electo dicto presentetur priori et si ydoneus fuerit ab priore domino Londoniensi episcopo presentabitur Qui post electionis sue confirmationem in capitulo dictorum prioris et canonicorum iurabit priori obedienciam et tam priori quam conuentui fidelitatem Et ne idem magister a prefato priore vel conuentu super inobediencia possit redargui [si] pro sua voluntate que [sibi] placeret in virtute obediencie ualeret iniungere sciendum quod dictus magister non tenebitur ad obedienciam memorato priori exhibendam nisi in articulis tantum in hac ordinacione nostra subsequenter contentis Cum autem aliquis in fratrem fuerit recipiendus a priore petatur licencia et si ignotus fuerit priori recipiendus et magister et fratres hospitalis sancti Bartholomei in obediencia et fidelitate qua ei tenentur asserant quod credant eum esse ydoneum et domui sue necessarium prior omni cessante cavillatione prebebit assensum Si vero notus et ydoneus similiter Si notus non tamen secundum oppinionem prioris ydoneus magistro et fratribus credentibus et asserentibus ipsum ydoneum hoc per episcopum vel eius officialem vel si absentes fuerint et negocium instanciam desideret per capitulum sancti Pauli discutiatur et si ydoneus inueniatur admittatur non obstante prioris reclamatione Et cum admissus fuerit accedat prior uel mittat ad capitulum fratrum hospitalis et habitum tradat admisso Quo facto iurabit admissus ibidem presente priore et magistro hospitalis dictis priori et conuentui fidelitatem et magistro loci obedienciam Si vero aliquis egrotans fraternitatem dictorum fratrum hospitalis desideret hoc priori insinuetur ut ipse incontinenti ad egrotum accedat uel mittat et habitum ei si uoluerit tradat alioquin ne mora dicto hospitali sit periculosa liceat loci magistro eidem auctoritate sua habitum tradere Similiter si extra ciuitatem egrotans habitum dictorum fratrum desideret Qui si conualuerit infra octo dies post conualescenciam in fratrum capitulo sicut predictum est sacramentum fidelitatis faciet dictis priori et conventui et magistro loci obedienciam Eadem forma obseruetur de sororibus recipiendis Cum uero fratres hospitalis exierint ad predicandum uel ad elemosinas colligendas iurabunt quod nichil in tota vita sua petent nisi nomine expresso hospitalis sancti Bartholomei nec recipient aliquid quod ad canonicos sancti Bartholomei pertineat quod si fecerint cum redierint eisdem canonicis sine diminucione restituent Idem uero canonici cum exierint in virtute obediencie priori suo promittunt videlicet quod nichil petent nisi expresso nomine canonicorum Sancti Bartholomei et si aliquid receperint nomine hospitalis uel quod ad hospitale pertineat fratribus hospitalis bona fide et integre restituent Et si conuersus fuerit illud idem iurabit Nec aliquis etiam laicus ad elemosinas colligendas ab alterutra domo mittatur nisi prius prefato prestito iuramento Magister uero hospitalis fratrum et sororum excessus per se si possit corrigat Quod si non possit ad instanciam magistri hospitalis prior sancti Bartholomei ad fratrum capitulum accedat ut corrigenda de ipsius consilio et magistri corrigantur Quod si negligentes fuerint vel per ipsos corrigi nequiuerint per episcopum vel eius officialem correctio adhibeatur Magister uero hospitalis nulli inperpetuum victum perpetuum irrequisito prioris assensu dare poterit nec alienationes reddituum uel possessionum inperpetuum facere nisi ob necessitatem uel domus hospitalis utilitatem et secundum quod iustum fuerit Sigillum hospitalis sub tribus clauibus custodiatur quarum unam habebit magister hospitalis et duas alias duo de fratribus eiusdem hospitalis per magistrum et fratres hospitalis de consilio dicti prioris ad hoc electi quos idem prior refutare vel mutare non poterit dum modo magister et fratres hospitali ipsos credant ydoneos Magister et fratres omnes qui sani fuerint et presentes in civitate exceptis pauperum obsequio deputatis die Pasch[] floridi et die ascensionis domini nisi rationabili causa fuerint prepediti ad processionem sancti Bartholomei venient et eam sequentur Die siquidem sancti Bartholomei duo de fratribus sepedicti hospitalis duos cereos de suo quatuor librarum nomine magistri et fratrum suorum ad processionem deferent et expleta processione illos ad maius altare sancti Bartholomei offerent Quo facto absque calumpnia cum voluerint ad domum suam reuertentur Altare siue ymago sancti Bartholomei in prefato hospitali in dictorum canonicorum preiudicium non erigatur in perpetuum Nec campanas plures quam modo videlicet duas nec maiores nec campanile solempnius dicti fratres habeant Illud tamen perficiatur in vigilia pasche non pulsabunt priusquam pulsetur apud sanctum Bartholomeum Cimiterium uero quod fratres ex indulgencia domini pape sibi concessum petebant benedici non habebunt nec aliud petent decetero quam cimiterium apud dictos canonicos sepulture pauperum deputatum Si quis tamen de ciuitate Lond[] uel aliunde sepulturam pauperum hospitalis elegerit corpore ipsius ad idem hospitale delato et missa pro ipsius et pro fidelium animabus celebrata in dicto cimiterio sepulture pauperum deputato ac si inter pauperes in eodem hospitali decessisset tumulabitur Beneficium uero quod fratres hospitalis a memoratis hactenus perceperunt canonicis scilicet totam panis sui decimationem canonicorum et fratrum panis potus piscis et carnium reliquias cum canonicorum aniuersaria maiori hilaritate et uberius si fieri potest quam hactenus consueuerunt percipient si huiusmodi aniuersaria alicui vel alicubi dentur et dictorum canonicorum ad ipsorum collationes suppetant facultates Hanc autem ordinationem nostram et amicabilem compositionem utraque partium firmiter et bona fide iuramento interposito se observaturam promisit renuncians appellationi suplicationi et in integrum restitucioni item omnibus questionibus tempore istius compositionis mutuo adinuicem competentibus siue mote fuerint siue non et omnibus instrumentis impetratis et impetrandis ita quod si qua fuerint instrumenta alterutrius partis hanc compositionem tantum modo contigencia pro cancellatis habebuntur Si vero aliquam fuerint que non solum hanc compositionem contingant set et alios contineant articulos quantum ad hanc compositionem pro cancellatis habebuntur et quantum ad alia suam optineant firmitatem Si uero super premissis prior et conuentus ex una parte vel magister et fratres ex altera difficiles se reddiderint vel super eisdem inter ipsos questionem oriri contingat ad episcopum vel eius officialem uel eis absentibus ad capitulum sancti Pauli querimonia deferatur et ibidem omni appellatione et cauillatione remotis terminetur Ut autem hec nostra ordinacio rata et inconcussa futuris permaneat temporibus presenti scripto in modum cyrographi tripartite confecto sigillum nostrum et capituli nostri una cum sigillis partium duximus apponendum cuius una pars penes dictum priorem et canonicos sancti Bartholomei altera penes magistrum et fratres memorati hospitalis et tertia in thesauro sancti Pauli remanebit Et ne aliquid de contentis capitulis per obliuionem negligatur prior cum aliquot de canonicis suis singulis annis in crastino cinerum ad capitulum fratrum dicti hospitalis et ibi congregatis fratribus in communi audiencia cyrographum suum legi faciat feria vero sexta sequenti magistri hospitalis cum aliquod de fratribus suis hora capituli ad capitulum sancti Bartholomei accedat et ibi cyrographum suum similiter legi faciat Actum Lond[] apud sanctum Paulum kalendis Iulii pontificatus nostri anno tercio saluis in omnibus iure et dignitate Lond[] ecclesie

Source Fulltext: Early Charters of the Cathedral Church of St. Paul, London. Marion Gibbs. Camden Third Series, V.58. Offices of the Royal Historical Society. London. 1939.