Omnibus Christi fidelibus ad quos presens scriptum peruenerit Godefridus Dei gratia Wintoniensis ecclesie minister eternam in Domino salutem Ea que locis religionis pia fidelium largitione conferuntur scriptis expedit auctenticis communire et ne qua possint calliditate malignantium inquietari propensius prouidere Ea propter uniuersitati uestre uolumus innotescere nos attendentes honestatem et religionis feruorem dilectorum in Domino abbatis et conuentus Sancti Johannis Colecestrie nec non et sincere caritatis deuotionem quam erga nos et ecclesiam Wintonie habere noscuntur concessisse et pontificiali auctoritate confirmasse prefatis abbati et conuentui pensionem viginti solidorum et duodecim denariorum de ecclesia de Estede per manum ejus qui ad eorum presentationem per nos et successores nostros in eadem ecclesia perpetuus vicarius instituetur singulis annis percipiendam Ut autem hec nostra concessio et confirmatio perpetuam optineat firmitatem eam presenti scripto et sigilli nostri patrocinio roborauimus Saluo in omnibus jure episcopali et auctoritate et dignitate Wintoniensis ecclesie Data apud Mertonam per manum Reginaldi clerici nostri vi Kalendas Nouembris Pontificatus nostri anno nono Testibus hiis Oliuero Mot Eustachio de Falcoberge Magistro Willelmo de Turri Roberto de Luci Gregorio et Humfredo cappellanis Godefrido Philippo clericis

Source Fulltext: Cartularium Monasterii sancti Johanni Baptiste de Colecestria. S. A. Moore. Roxburghe Club Publications, 131. Roxburghe Club Publications. Chiswick Press. London. 1897.