Uniuersis Cristi fidelibus presens scriptum uisuris uel audituris Stephanus de Walecote salutem in domino eternam Nouerit uniuersitas uestra quod ego pro me et heredibus meis concessi et presentis scripti tenore confirmaui et quietum clamaui si contingat quod absit me cessare in solutione xii solidos et quatuor denarios quos soluo annuatim magistro et fratribus militie Templi ad duos anni terminos uidelicet ad festum sancti Michelis sex solidos et duos denarios et ad Pascham sex solidos et duos denarios et hoc pro quadam terra quam ab eis ad firmam teneo quod predicti magister et fratres predictam terram possint in manus suas capere et saisire et eam ex tunc in perpetuum sine omni impedimento uel contradictione mei uel heredum meorum uel cuiuscumque alterius libere et quiete tamquam suam tenere et possidere ita quod nec ego nec heredes mei nec quisquam alius pro nobis uolens hac occasione aliquid ius in dicta terra clamare nec per breue domini regis nec per aliquid aliud ius uel auxilium decetero audiamur In cuius rei etc Datum apud Couele in crastino translationis beati Thome martiris anno domini m cc lxx secundo Hiis testibus domino Gilberto de Kirkeby tunc uicecomite Oxonie Roberto de Luches Laurentio de Luches Thome le Frankeleyn Ricardo le Frankeleyn Willelmo de Raunsham de Saunford et aliis

Source Fulltext: Sandford Cartulary. A. M. Leys. Oxfordshire Record Series, V.12. Oxfordshire Record Society. Oxford. 1938.