Nouerint omnes quod Nicholaus prior Sancti Dion iuxta Sutht et magister Ricardus dictus Anglicus executores testamenti Claremunde mulieris de Sutht defuncte resignauerunt in perpetuum nomine executorio et tradiderunt canonicis dicte ecclesie pro sex marcis sterlingorum quas ipsi canonici dictis executoribus pre manibus dederunt ad faciendam executionem predicti testamenti unam acram terre in suburbio Sutht iuxta Magdalenam in crofta que uocatur Brihtwoldeslond quam dicta Claremunda de dictis canonicis tenuit Preterea concesserunt et tradiderunt predicti executores memoratis canonicis in perpetuum pro quinque marcis sterlingorum quas ipsi canonici eisdem pre manibus dederunt ad supradictam executionem complendam quatuor solidos annui redditus de mesuagio quod fuit Alexandri Rotarii extra portam borealem uille Sutht ex orientali parte uici iuxta domum Ricardi de Badesley ex parte aquilonari et duodecim denarios annui redditus de mesuagio Ricardi de Badesley extra eandem portam ex eadem parte uici Quem quidem redditum dicta Claremunda ad se pertinentem cum predicta acra terre per manus dictorum executorum suorum in suo testamento in pios usus erogari precepit Et in premissorum robur et testimonium predicti executores presenti scripto sigilla sua apposuerunt Dat mense Septembris anno domini mcclxxvi

Source Fulltext: Cartulary of the Priory of St. Denys near Southampton. E. O. Blake. Southampton Record Series, V.24. Southampton University Press. Southampton. 1981.