Uniuersis sancte matris ecclesie filiis ad quos presens scriptum peruenerit Sampson dei gratia Abbas sancti Edmundi et conuentus eiusdem loci eternam in domino salutem Uniuersitati uestre notum esse uolumus nos intuitu caritatis et pro salute anime Radulphi de Neketone concessisse et dedisse magistro Willelmo de Neketone licentiam edificandi capellam unam in honore sancti Iohannis euangeliste in cimiterio sancti Edmundi inter magnum clocarium et portam sancti Iacobi ut ibi imperpetuum diuina celebrentur tam pro uiuis quam pro defunctis et specialiter pro animabus abbatum sancti Edmundi et conuentus eiusdem loci et predictorum Radulphi et Willelmi et omnium antecessorum et successorum suorum et omnium fidelium Intuitu et deuotionis et caritatis quam predictus magister Willelmus habet erga nos et monasterium sancti Edmundi concessimus eidem capelle cum fuerit edificata in sustentationem capellani eiusdem loci conredium unius monachi suscipiendi de celario nostro quamdiu ego Sampson dei gratia Abbas sancti Edmundi uixero cum autem uniuerse carnis uias ingressus fuero conredium meum quod ex institutione antiqua domus nostre erit imperpetuum perpetuo iure cedet in usus capellani predicte capelle Ita quod celarium nostrum quietum erit de predicto conredio indulta M Willelmo predicto tali dignitate et libertate ut omnibus diebus uite sue liceat ei presentare sacriste sancti Edmundi uirum honeste opinionis et conuersationis capellanum qui in eadem capella ad eius presentationem et sacriste institutionem sine contradictione ministret medio autem tempore ante consummationem capelle sepedicte capellanus quem magister Willelmus elegerit celebrabit diuina in ecclesia sancti Iacobi ad unum altare omnibus diebus forma suprascripta et interim accipiet conredium sepenominatum de celario nostro post mortem autem sepedicti magistri Willelmi predicte capelle institutio et omnimoda dispositio libera remanebit imperpetuum sacriste sancti Edmundi qui de ea ut et de ceteri capellis sancti Edmundi libere et salubriter disponet Facta est autem hec concessio nostra Anno ab Incarnatione domini mccv His testibus Herberto priore Hermero suppriore Roberto precentore Ricardo de Cokefelde Gileberto del Estane Adam camerarius Galfridus de Lauardin Iohanne fratre eius et multis aliis

Source Fulltext: Kalendar of Abbot Samson of Bury St. Edmunds. R. H. C. Davis. Camden Third Series, V.84. Offices of the Royal Historical Society. London. 1954.