Omnibus sancte matris ecclesie filiis ad quos presens scriptum pervenerit Johannes Dei gratia Norwicensis episcopus salutem in domino Ad universorum volumus noticiam pervenire quod a multis retroactis temporibus sokagium prioris et conventus de Norwico in Thornham scilicet laicum feodum quod fuit Thurstini diaconi ab ecclesia de Thornham fuisset indivisum presbiteris sibi succedentibus pluribus tenentibus utrumque solvendo quadraginta summas bladi monachis Norwicensibus scilicet viginti frumenti et decem ordei quinque fabarum et quinque pisarum tractus temporis grave generabat prejudicium ecclesie cum non satis certum esset quid ad sokagium quid ad ecclesiam de terra pertineret vel quantum persone ecclesie firmarii sokagii de predicta annona nomine ecclesie et quantum nomine sokagii priori et monachis persolvissent Nos igitur volentes indempnitati ecclesie nostre providere fecimus seperari laicum feodum a libera terra ecclesie et determinari quantum de predicta annona nomine ecclesie et quantum nomine sokagii solutum fuerit per sacramentum duodecim legalium et liberorum hominum et testimonium totius capituli clericorum et soke de Thornham Omnibus asserentibus et testificantibus quod de predicta summa annone tamen quatuor summe frumenti ad sokagium pertineant solvenda et triginta sex pro ecclesia Et ideo concedimus et hac presenti carta nostra confirmamus dilectis filiis nostris priori et monachis Norwic[] hoc annuum beneficium in ecclesia de Thornham scilicet sexdecim summas frumenti et decem ordei quinque fabarum et quinque pisarum per manum persone eiusdem ecclesie eis annuatim persolvendorum in perpetuum salva nobis et successoribus nostris in perpetuum donatione eiusdem ecclesie cum omnibus ad illam pertinentibus non requisito monachorum consensu cui voluerimus conferende Ita quod decetero remaneat monachis sokagium suum cum omnibus ad illud pertinentibus sicut per juramentum predictum determinatum est libere possidendum salvis nobis et successoribus nostris servitiis et consuetudinibus inperpetuum que ad idem sokagium pertinent Hiis testibus archidiacono de Richem[] Roberto de Dunelm[] David de Ruddebi Johanne de Wimundham Johanne de Derham et aliis Dat[] per manum magistri G de Deierham idibus Decembris pontificatus nostri anno sexto

Source Fulltext: Charters of Norwich Cathedral Priory. Barbara Dodwell. Pipe Roll Society, V.78, New Series V.40. Pipe Roll Society. J. W. Ruddock. London. 1974.