Sciant presentes et futuri quod ego Iohannes filius Iohannis Sewy de Oxonia et Katerina filia Iohannis Filekyng uxor mea concessimus remisimus et penitus quietum clamauimus pro nobis et heredibus nostris uel nostris assignatis fratri Nicholao magistro hospitalis sancti Iohannis extra portam orientalem Oxonie et eiusdem loci confratribus et eorum successoribus totum ius et clamium quod aliquo tempore habuimus uel aliquo modo habere potuimus in duobus mesuagiis in uilla Oxonie cum suis pertinentiis que scilicet mesuagia sita sunt in parochia sancti Petri in oriente unde unum mesuagium iacet iuxta mesuagium domini Willelmi uicarii de Elsefeld ex parte orientali quod quidem mesuagium Iohannes Filekyng aliquando consueuit inhabitare et aliud mesuagium iacet in predicta parochia iuxta mesuagium Galfridi de Stocwelle in cimiterio sancti Petri in oriente ex parte australi ita quod nec nos nec heredes nostri nec nostri assignati uel aliquis nostro nomine aliquod ius uel clamium in predictis mesuagiis seculo durante uel eorum pertinentiis exigere poterimus in posterum uel uendicare imperpetuum Pro hac autem nostra concessione remissione et quieta clamatione dederunt nobis predicti magister et fratres decem libras argenti bone et legalis monete in gersumam pre manibus Et ut hec omnia rata permaneant imperpetuum hoc presens scriptum sigillorum nostrorum impressione roborauimus Hiis testibus Nicholao de Kyngestone tunc maiore Oxonie Iohanne Culuerd et Thoma de Sowi tunc balliuis Henrico Oweyn Willelmo Ypothecario Willelmo de Ew Iohanne de Ew Philippo de Ew Iohanne Sewi senior Radulpho Plumbatore et aliis

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.