Hec est conuentio facta inter fratres hospitalis sancti Iohannis ad portam orientalem Oxonie et Robertum Waldri et Amitiam uxorem predicti Roberti scilicet quod predicti fratres concesserunt dimiserunt et liberauerunt predicto Roberto et Amitie uxori eius illam terram cum pertinentiis que iacet inter terram Tome Scriptoris et terram predicti Roberti in parrochia sancti Petri uersus portam orientalem Oxonie habend et tenend predictis Roberto et Amitie et assignatis predicti Roberti de fratribus predicti hospitalis libere quiete et integre imperpetuum pro qua terra predicti Robertus et Amitia quamdiu uiuent reddent annuatim fratribus predicti hospitalis decem solidos ad quatuor terminos anni scilicet ad festum sancti Michelis duos solidos et sex denarios et ad Natale domini duos solidos et vi denarios et ad festum sancte Marie in Martio duos solidos et vi denarios et ad Natiuitatem sancti Iohannis ii solidos et vi denarios Et post obitum predictorum Roberti et Amitie uxoris eius assignati predicti Roberti reddent annuatim fratribus predicti hospitalis pro predicta terra unam marcam ad predictos terminos et dabunt unam marcam in gersumma predictis fratribus Et predicti fratres warantizabunt predictam terram cum pertinentiis predicto Roberto Waldri et Amitie uxori eius quamdiu uiuent et post obitum predicti Roberti et Amitie uxoris eius predicti fratres warantizabunt predictam terram assignatis predicti Roberti exceptis uiris religiosis sed non exceptis fratribus predicti hospitalis Et ut hec conuentio rata permaneat ex utraque parte affidata est et sigillis eorum alternatim confirmata Hiis testibus Iohanne Pady tunc maiore Iordano Ruffo Petro filio Turoldi tunc prepositis Roberto Oein Philippo Molendinario Ricardo Molendinario Rogero Petit Andrea Halegod Laurentio Halegod Toma Scriptore et aliis

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.