Hec est conuentio facta inter fratres hospitalis sancti Iohannis ad portam orientalem Oxonie et Galfridum Malin et Mabillam uxorem eius filiam Willelmi de Reins scilicet quod predicti fratres concesserunt dimiserunt et liberauerunt predictis Galfrido et Mabille totam illam terram cum pertinentiis que iacet inter terram que fuit Malin Picot et terram anacorite ecclesie sancti Petri uersus portam orientalem Oxonie predictis Galfrido Malin et Mabille uxori eius et heredibus eorum habend et tenend de predictis fratribus in feodo et hereditate libere quiete et integre reddendo inde annuatim predictis fratribus quatuor solidos ad quatuor terminos anni pro omni seruitio scilicet ad festum sancti Michelis xii d et ad Natale Domini xii d et ad festum sancte Marie in Martio xii d et ad Natiuitatem sancti Iohannis xii d et sciendum quod hec predicta terra saisiata fuit in manu domini regis pro defectu seruitii murandi pro quo seruitio fratres predicti hospitalis fecerunt finem pro xxxv solidis et intrauerunt in seruitium illud Et ut hec conuentio rata permaneat uterque predictorum alterius scripto alternatim sigillum suum apposuit Et sciendum quod tertia pars istius scripti est in archa domini regis in Oxonia Hiis testibus Iohanne Pady tunc maiore Iordano Ruffo et Petro filio Turoldi tunc prepositis Philippo Molendinario Roberto Oein Ricardo Molendinario Pentecoste Andrea Halegod Willelmo Clerico

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.