Sciant presentes et futuri quod ego Iohannes Pilet dedi concessi assignaui et hac carta mea confirmaui magistro Philippo Pille pro seruitio suo dimidiam marcham annualis redditus percipiendam annuatim de domo quondam Walteri Yngge in magno uico in parochia beate Marie uirginis Oxonie et de domo que erat Iohannis Kepharm in magno uico in parochia sancti Petri orientalis Oxonie infra portam quam quidem dimidiam marcham recipiet predictus magister Philippus Pille de Hospitali sancti Iohannis extra portam orientalem Oxonie ad duos anni terminos uidelicet ad Pascha quadraginta denarios et ad festum sancti Michelis quadraginta denarios habend et tenend predicto magistro Philippo Pille et heredibus suis uel suis assignatis libere quiete integre et pacifice imperpetuum reddendo annuatim michi et heredibus meis unum denarium ad Pascha pro omni seruitio et si ita contingat quod predicta dimidia marcha aretro fuerit quin plenarie annuatim ad dictos terminos sibi soluatur bene licet predicto magistro Philippo Piile intrare in predicta tenementa ad namiandum infra et extra assidue usque dum plenarie predicta dimidia marcha sibi persoluatur Et ego et heredes mei warantizabimus predictam dimidiam marcham annualis redditus predicto magistro Philippo Pille et heredibus suis et suis assignatis contra omnes homines mares et feminas Et ut hec mea donatio concessio assignatio confirmatio et warantizatio firma et stabilia in perpetuum permaneant hanc presentem cartam sigillo meo confirmaui Hiis testibus Thoma filio Walteri tunc maiore Oxonie Alfrido Speciario et Hugone Cordewanario tunc prepositis Oxonie Waltero Aurifabro et Galfrido fratre eius Laurentio Ruffo Iohanne Curci Willelmo le Ceinter et multis aliis

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.