Notum sit Christi fidelibus uniuersis quod nos frater Ricardus prior Ecclesie conuentualis beate marie de Dunmawe et eiusdem loci conuentus de communi consensu nostro et capituli nostri tenore presencium concedimus magistro Willelmo de Namdone clerico nostro pro suo laudabili seruicio nobis et ecclesie nostre impenso fideliter et impendendo liberaciones subscriptas suo perpetuo Uidelicet duos panes albos minoris ponderis de pastu conuentus unam lagenam ceruisie melioris unum ferculum cum una pitancia et potagio conuentus ad opus eiusdem et ad opus sui seruientis unum panem album et alterum panem integrum unam lagenam ceruisie mixte et unum ferculum cum potagio singulis annis et diebus quibus idem Willelmus uoluerit et eidem placuerit percipiendum plenarie de celario et de coquina nostra ut permittitur Concedimus etiam eidem domum seu cameram integre infra septa curie nostre ad inhabitandum in ea quam dominus hugo de poselingewurthe quondam concanonicus noster inhabitare consueuit In cuius rei testimonium sigillum capituli nostri commune presentibus apposuimus Datum in capitulo nostro ad hoc specialiter conuocato pridie Nonarum maii Anno gratie millesimo ducentesimo octogesimo Nono

Source Fulltext: Cartulary of Little Dunmowe Priory. British Library, Harley Ms. 662. Archaeologia Cantiana, V.10. Kent Archaeological Society. 1876.