Assisa venit recognitura si abbas de Thorneye Prior de Ely Johannes le Mareschal Stephanus le Fotoar et alii et caetera disseisiuerunt abbatem de Rameseia de libero tenemento suo in Rameseia post primam et caetera Et unde queritur quod disseisiuerunt eum de tribus millibus et octingentis acris marisci cum pertinentiis in eadem villa Et abbas de Thorneye venit et prior de Ely et alii non venerunt nec fuerunt attachiati quia non fuerunt inventi Ideo capiatur assisa versus eos per defaltam Et super hoc venit ballivus episcopi Elyensis et dicit quod tenementa unde queritur se disseisiri sunt in comitatu Cantebrigiae in insula de Ely et petit quod assisa non fiat inde in praejudicium curiae Elyensis et caetera Et abbas de Thorneye dicit pro se et aliis quod assisa non debet inde fieri quia dicit quod tenementa de quibus modo queritur se disseisiri sunt in comitatu Cantebrigiae in villa de Witleseye et non in comitatu Huntingdoniae in villa de Rameseia Et petit judicium si assisa de tenementis in comitatu Cantebrigiae debeat fieri in comitatu Huntingdoniae Dicit ulterius quod si convictum sit per assisam quod praedicta tenementa sint in comitatu Huntingdoniae et non in comitatu Cantebrigiae quod nullam inde fecit injuriam neque disseisinam quia dicit quod die quo creatus fuit abbas invenit ecclesiam suam de Thorneye seisitam de praedictis tenementis et de hoc ponit se super assisam et caetera Et abbas de Rameseia dicit quod die quo et caetera invenit ecclesiam suam de Rameseia seysitam de praedictis tenementis et inde extitit in bona et pacifica seysina quousque idem abbas de Thorneye et alii ipsum injuste et caetera disseis[iv]erunt Et quod ita sit petit quod inquiratur per assisam et abbas de Thorneye similiter Juratores dicunt super sacramentum suum quod utrum tot acras quod idem abbas de Rameseia posuit in querela sua sint in tenemento quod posuit in visu suo vel sive majus sit ibi sive minus ignorant Dicunt insuper quod tenementa de quibus fecerunt visum sunt in comitatu Huntingdonia de pertinentiis manerii de Rameseia et non in Withleseye in comitatu Cantebrigiae Quia dicunt quod bundae tenementorum unde fecerunt visum sunt de Gangestede usque Schirmere et de Schirmere usque Hundelake de quibus tenementis praedictus abbas de Rameseia et omnes praedecessores sui a tempore quo non extat memoria fuerunt in seysina sua ut de libero tenemento suo quousque praedictus abbas de Thorneye Prior de Ely et alii ipsum abbatem de Rameseia injuste et caetera disseisiverunt Et requisiti si disseisina illa facta fuit per vim et arma dicunt quod omnes praenominati disseysitores praeter praedictos abbatem de Thorneye et priorem venerunt cum vi et armis ad illam disseysinam faciendam Ideo consideratum est quod praedictus abbas de Rameseia recuperet seysinam suam de tenementis praedictis per visum recognitorum Et abbas Thorneye et alii in misericordia Et quia praedicti Johannes le Mareschal et alii ut praedictum est venerunt cum vi et armis consideratum est quod capiantur pro transgressione

Source Fulltext: Cartularium monasterii de Rameseia. W. H. Hart and P. A. Lyons. Rerum Britannicarum Medii Aevi Scriptores, 79. Kraus. Nendeln. 1965.