Nigellus Dei gratia Elyensis ecclesie episcopus universo clero suo baronibus ministris hominibus et amicis suis Francis et Anglis totius honoris sancte Aetheldrethe et cunctis filiis sancte ecclesie salutem et benedictionem Quoniam inter cetera fidei opera precipuum est matrem ecclesiam devotis officiis honorare et variis beneficiis ampliare nobis maxime qui pastoralis regiminis onus et honorem portamus hoc honorabile officium incumbit ut exemplo legalis tabernaculi et veteris templi pretiosis eam auri et argenti gemmarum vestium vasorumque ornamentis decoremus et in usus servorum Dei necessaria ministremus Quapropter ego Nigellus Elyensis episcopus ut partem aliquam cum sanctis obtineam pastoribus commissum mihi divinitus monachorum conventum in Elyensi ecclesia Deo servientem et donis et personis et possessionibus et edificiis et aliis diversis beneficiis dilatare atque ampliare desidero Ideoque illis plena libertate reddo atque constituo manerium de Hadestoche cum ecclesia que ibi est sicut antiquam et propriam eorum possessionem cum omnibus appendiciis suis scilicet in omnibus rectitudinibus et libertatibus et consuetudinibus in bosco in plano in terris in decimis in apportatibus in piscariis in paludibus et in omnibus aliis rebus tam ipsi manerio quam eidem ecclesie pertinentibus firmo et stabili iure amodo et in sempiternum scilicet proprie et specialiter ad facienda opera feretri sancte Aetheldrethe et altaris Et volo et precipio et presenti carta mea confirmo ut idem monachi nostri bene et in pace et libere et quiete et honorifice idem manerium cum prefata ecclesia cum omnibus supradictis ad predicta opera inconcusse teneant sicut unquam liberius et honorabilius ea tenuerunt in tempore istorum predecessorum meorum Elyensis ecclesie abbatum videlicet Aelfsini Leofsini Wlfrici Thurstani Theodwini et Simeonis Idem vero monachi nostri ex precepto et consilio et decreto nostro providerunt ut quia locus ille antique religioni sub beato Botulfo abbate ibidem quiescente fuerat consecratus amodo ad honorem Dei et eiusdem sancti religiosius ibi serviatur vetusque religio que possessorum negligentia perierat ex aliqua parte renovetur Quicumque ergo hanc nostre auctoritatis confirmationem conservaverit Dei omnipotentis omniumque sanctorum benedictionem consequatur Quisquis vero violator extiterit nisi velociter resipiscat et condigne satisfaciat eternam cum diabolo et angelis eius maledictionem sortiatur sitque iuxta vocem apostoli Pauli anathema maranatha per omnia secula seculorum Amen His testibus Rodberto abbate Thorneie Theinberto priore Willelmo archidiacono Gocelino de Ely clerico Petro clerico Alexandro clerico Willelmo monacho de Sceldforda Radulfo camerario et multis aliis

Source Fulltext: Liber Eliensis. E. O. Blake. Camden Third Series, V.92. Offices of the Royal Historical Society. London. 1962.