Dilectis in Christo fratribus universis Sanctae Ecclesiae filiis R Herfordensis Dei gratia episcopus Dominum expectare solicite et venientem gratulanter amplecti Quia Ecclesiam Dei regendam et in aliqua sui portione administrandam Domino permittente suscepimus ejus commoditati quoad possumus consulere ac providere credita nobis dispensatione debemus Quod ita recte fieri arbitramur si confracta solidando et quae dissipata sunt in corpus unum redigendo tam incolumitati ejus quam ampliando divine cultui studuerimus deservire Quoniam igitur omnibus pie credentibus manifestum habetur nec forum religioni convenire nec castellum qui tumultus et sanguinum locus est servientium Domino paci congruere ecclesiam Beati Petri in foro Herfordiae sitam et ecclesiam Sancti Gutlaci intra ambitum castelli ipsius inopportune positam et omnes possessiones et parochias et dignitates earum in unius ecclesiae corpus redegimus et eam ecclesiam Apostolorum Petri et Pauli et Sancti Gutlaci quam extra civitatem ipsam in loco religioni aptissimo aedificari fecimus ad serviendum Domino in perpetuum episcopali auctoritate sancivimus Et ne auctoritate nostra gravare quempiam aut juri cujuspiam praejudicare videamur tam his qui sunt quam filiis qui nascentur et exsurgent post nos praesenti scripto notum facimus Rogerum De Port qui ecclesiam Sancti Gutlaci diu injuste utpote laicus tenuerat et possessiones ejus indigne distribuerat peccatum hoc grande humiliter cognovisse et in praesentia mea et fratris Radulfi decani nostri et canonicorum nostrorum magistri Hugonis de Cliffort et magistri Hugonis de Norhamtona et domini Hugonis de Calco et aliorum tam clericorum quam laicorum quamplurium ecclesiam ipsam ut divinis officiis plenius assignaretur in manu nostra penitus refutasse Ipso itaque Rogero devote supplicante venerabili etiam fratre nostro Gilleberto abbate Gloecestriae et conventu ipsius benigne annuente praedictas ecclesias in unam conjunximus et hanc illarum possessionibus dignitatibus et pertinentiis omnibus fundatam et dotatam perpetuae Apostolorum Petri et Pauli et Sancti Gutlaci venerationi designavimus Et quia conventum fratrum ibidem Deo servientium et ibidem regulariter viventium per manum praedicti abbatis Gloecestriae Deo disponente suscepturi sumus hanc ipsam Apostolorum et Sancti Gutlaci ecclesiam praefati abbatis omniumque successorum ejus obedientiae et ecclesiae Beati Petri Gloecestriae custodiae et subjectioni capitulo ecclesiae nostrae in his omnibus unanimiter assentiente commisimus Quicumque ergo hoc pietatis opus pie attenderint manumque auxiliatricem ad hoc confirmandum cum fideli devotione porrexerint perpetuam quae inibi agentur orationum communionem episcopalem a me qualicumque ecclesiae ministro benedictionem a Summo autem Pontifice Christo aeternam consequantur retributionem Amen

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.