Assisa uenit recognoscere quis aduocatus tempore pacis presentauit ultimo personam que mortua est ad ecclesiam sancti Augustini de Wichio que uacat etc Cuius aduocationem Willelmus de Stuteuile et Margeria uxor eius clamant uersus priorem sancte Marie de Wigorn[] qui uenit et dicit quod assisa non debet inde fieri quia ecclesiam illam habet ex dono antecessorum eiusdem Margerie et inde profert cartam Osberti filii Hugonis fratris aui ipsius Margerie que testatur quod ipse concedit et confirmat priori et monachis Wigorn[] ecclesie illam annuam pensionem c solidorum quam b[aldwinus] Wigorn[] episcopus de ecclesia de Duderhull[] eis assignauit salua presentatione ipsius Osberti et proximi heredis sui secundum quod continetur in carta bone memorie Rogeri Wigorn[] episcopi Profert etiam cartam Hugonis de Say fratris ipsius Osberti que testatur quod ipse concedit etc priori et monachis etc illam annuam pensionem c solidorum quam b[aldwinus] Wigorn[] episcopus de ecclesia de Duderhull[] eis assignauit et predictus Osbertus frater suus illis per cartam suam confirmauit salua presentatione sua in uita sua tantum secundum quod continetur in carta bone memorie Rogeri quondam Wigorn[] episcopi Non uult autem ut per predictam cartam Rogeri episcopi confirmationis sue fiat aliqua diminutio uel preiudicium per hoc quod in ea pensio dimidie marce uel xx solidorum expressa continetur Post mortem uero suam et persone ante eius mortem institute predicta ecclesia tota cum iure aduocationis et presentationis absque aliqua diminutione et reclamatione heredum suorum libere in usus monachorum in perpetuum conuertetur etc Profert etiam cartam predicti Rogeri episcopi que testatur quod idem monachi ex consensu suo concesserunt Osberto filio Hugonis et uni tantum heredum suorum qui proxima successione ei succederet presentationem persone ad ecclesiam sancti Augustini de Duderhull[] que ad eosdem monachos Wigorn[] noscitur pertinere Et post decessum ipsius Osberti filii Hugonis et proximi eiusdem heredis salua presentatione persone prius institute et ecclesia de Duderhull[] cum omnibus pertinentiis suis absque omni reclamatione aliorum heredum Osberti in perpetuam elemosinam in usus monachorum Wigornie conuertetur Unde per cartas illas debet ecclesia illa eis remanere Et Willelmus et Margeria per attornatum suum ueniunt et dicunt quod carte ille non debent eis nocere quia Hugo predictus licet esset proximus heres predicti Osberti et succedens eidem Osberto ipse tamen nunquam seisinam habuit de presentatione secundum quod continetur in cartis illis et preterea idem Hugo nunquam in uita sua cartam illam fecit et si facta fuit hoc fuit post mortem predicti Hugonis quia idem Hugo obiit in guerra in Wallia Consideratum est quod Willelmus et Margeria nichil capiant per hanc assisam et sint in misericordia et prior recuperauit seisinam suam

Source Fulltext: The Cartulary of Worcester Cathedral Priory. R. R. Darlington. Pipe Roll Society, V.76, New Series V.38. Pipe Roll Society. J. W. Ruddock. London. 1968.