Omnibus sancte matris ecclesie filiis ad quos peruenerit hec scriptura Bonefacius miseracione diuina archiepiscopus Cantuar[] tocius Angl[] primas salutem in domino sempiternam Inter pacis et discordie tranquillitatis et dissensionis semitas quamdiu laboramus in uia positi libenter aduertimus quam dulce sapiat in pacis pulcritudine delectari quantumque amaritudinis afferat molesta dissensio Caritatis enim quam pax nutriuerat refrigerium abicit cogitaciones malas immittit cor impellit et eleuat ex hoc lites et iurgia suboriri contingit expense fiunt inutiles lites ex litibus oriuntur bona pauperum que presertim ecclesiastici viri multo pretio deberent redimere ut ipsis pauperibus que sua sunt redderent consumuntur Hiis igitur animum nostrum pulsantibus eum habentes pre oculis Jesum Christum qui ut pacem emeret sanguinem suum fudit pacem amplectimur ut ad pacis vinculum uerbo pariter et exemplo dissidencium animos inuitemus Ea propter cum inter nos ecclesie nostre Cantuar[] nomine ex parte una et religiosos uiros [] priorem et capitulum Wygorniensis ecclesie ex altera super iurisdictione et potestate episcopali in ciuitate et diocesi Wygorn[] sede Wygorn[] vacante mota fuisset materia questionis et in domini [...] legati presencia dum esset in partibus Anglicanis aliquantulum agitata tandemque ad examen curie Romane usque perducta non absque multis hinc inde laboribus et expensis demum inuitante pacis auctore domino mediantibus bonis uiris et amatoribus unitatis talis inter nos composicio interuenit Videlicet quod quocienscumque et quandocumque sedem Wygorn[] uacare contigerit [...] prior et capitulum eiusdem loci uel supprior mortuo priore uel extra regnum absente quam primum comode poterunt vacacionem huiusmodi domino [] archiepiscopo Cantuar[] si in Anglia fuerit alioquin officiali curie Cantuar[] litteratorie intimabunt Et statim idem dominus archiepiscopus uel eius officialis sine mora et difficultate quacumque [...] priorem Wygorn[] qui pro tempore fuerit uel eiusdem loci suppriorem priore mortuo uel extra regnum absente donec prior redeat uel creetur et postmodum illum redeuntem uel creatum priorem irreuocabiliter et in solidum officialem suum creabit in ciuitate et diocesi Wygorn[] toto tempore vacacionis illius quoad cognicionem causarum ad forum episcopale spectantium institucionem et destitucionem clericorum electionum examinacionem et confirmacionem ac infirmacionem earum dignitatum et beneficiorum liberam collacionem auctoritate concilii et alias racionabiliter faciendam custodiarum emendarum ac prouentuum percepcionem visitacionem correctionem synodi conuocacionem et celebracionem vicinorum episcoporum inuitacionem cum canonico cautele studio censuram ecclesiasticam et omnem penitus ordinariam iurisdictionem imperium et potestatem episcopalem que sine presencia episcopali poterunt excerceri per dictum priorem aut suppriorem et alios quos sibi in hiis duxerit subrogandos auctoritate curie Cantuar[] plene et integre excercendas Que omnia et singula ac ea qualitercunque contingencia dictus prior uel supprior per se et alios auctoritate predicta Wygorn[] sede vacante libere excercebit Interim autem ab inicio vacacionis huiusmodi usque ad recepcionem specialis commissionis predicte dictus prior uel supprior per se et alios quos sibi in hiis duxerit subrogandos auctoritate curie Cantuar[] ex uirtute presentis composicionis ne ciuitas et diocesis Wygorn[] iudicis presencia careant premissa omnia et que ea contingere poterunt libere integre et plenarie excercebit Et prouentuum ac emolumentorum omnium exceptis procuracionibus quas in esculentis et poculentis percipiet tercia parte sibi pro laboribus et expensis retenta domino [...] archiepiscopo Cant[] qui pro tempore fuerit administrationis sue per se uel per alium reddita ratione fideliter restituet duas partes Nos igitur composicionem huiusmodi ratam et gratam habentes eam pro nobis et successoribus nostris imperpetuum bona fide promittimus obseruare et contra eam per nos uel per alium nullo modo uenire In cuius rei testimonium et perpetuam firmitatem sigillum nostrum presentibus est appensum Datum apud Thenham die sabbati proxima post festum sancti Jacobi apostoli anno gratie millesimo cc sexagesimo octauo

Source Fulltext: The Cartulary of Worcester Cathedral Priory. R. R. Darlington. Pipe Roll Society, V.76, New Series V.38. Pipe Roll Society. J. W. Ruddock. London. 1968.