Cum mota esset contencio per abbatem et conventum de Sallai contra abbatem et conventum de Wallay super quibusdam articulis de nimia propinquitate et majori caristia venalium causa propinquitatis abbacie de Wallay ad Salleiam datis judicibus a capitulo generali dominis videlicet de Rievalle et de Bella Landa abbatibus qui dictam causam secundum consuetudinem ordinis pace vel judicio terminarent tandem vocatis et assistentibus partibus coram dictis judicibus in ecclesia hospitalariorum juxta sanctum Botulphum in crastino sancti Petri ad vincula anno Domini m ccc quinto mediantibus venerabilibus patribus de Rivesbi et Swinesheved abbatibus et annuentibus prefatis judicibus in hac forma amicabiliter conquievit videlicet quod sopitis et extinctis penitus omnibus querelis de temporibus retroactis deinceps utraque pars bona fide alterius negocium tanquam proprium promovebit commodum et procurabit et si forte monachi vel conversi de Wallay contra domum de Sallai in aliquo notabiliter excesserint cum de tali transgressione abbati et monachis de Wallay manifeste constiterit delinquentes ad abbaciam de Sallai sine mora mittentur puniendi in capitulo monachorum secundum quantitatem delicti et ad arbitrium presidentis et si a parte ipsorum de Sallai aliquid tale contigerit per ipsos de Wallay similiter punientur et si illi de Wallay decimas venales habuerint quas abbas et conventus de Sallai suis usibus viderint competentes vendentur eis cicius et liberius quam aliis saltem pro precio quod alii dare volunt In cujus rei testimonium tam partes quam judices et mediatores huic scripto cirographato sigilla sua apposuerunt Datum apud sanctum Botulphum die et anno suprascriptis

Source Fulltext: Chartulary of the Cistercian Abbey of St. Mary of Sallay in Craven. Joseph MacNulty. Yorkshire Archaeological Society, V.87. Yorkshire Archaeological Society. West Yorkshire Print Co. Wakefield. 1933.