Sciant praesentes et futuri omnes ad quos praesens scriptum pervenerit quod cum ego Fulco Basset praepositus Beverlacensis missus essem in possessionem capellae et decimarum de Berewyk causa rei servandae auctoritate judicum a domino papa delegatorum et quaedam ibi inventa a servientibus meis distracta fuissent ego et magister S de Luci promisimus bona fide venerabili domino R Sarum episcopo quod infra dominicam Quadragesimae instantis secundum legitimam aestimationem R prioris de Stanlegh et magistri Roberti de Segre plenam in eadem capella distractorum faciemus restitutionem in pecunia numerata signis praedictorum assignanda et ibidem conservanda rebus in eo statu manentibus quo erant cum coepit distractio fieri quousque in forma judicii vel compositionis inde aliud agendum fuerit et si quis me probaverit vel meos in aliqua recepisse ad dictam capellam vel decimas non pertinentia secundum praedictorum virorum aestimationem et coram eis ea inde passis restituemus nisi prius fuerint restituta Ad haec firmiter observanda praedicto domino et patri nostro redditus nostros de Winterburne et de Fifhud appellatione remota obligavimus Et in hujus rei testimonium signa nostra huic scripto apposuimus

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.